მასალა ერთი პერსონისთვის: ქათმის ფილე - 200 (2 ცალი) ყველი (უმჯობესია ევროპული) – 50 გრ ბეკონი - 50 გრ (2 ნაჭერი) ტოსტის პური - 2 ნაჭერი პომიდორი - 100 გრ სალათის ფოთოლი - 100 გრ ცოტა ზეთი, სოიოს სოუსი, მშრალი ნიორი, თეთრი პილპილი, ცოტა მწვანე ხახვი, ტარხუნა და მარილი - გემოვნებით. მარინადისთვის: ზეითუნის ზეთი, დაფქული თეთრი წიწაკა, ნიორი, ორეგანო (თავშავა) - თვალის ზომით და გემოვნებით. მომზადების წესი: ქათმის ფილეებს ვჭრით შუაში, ისე რომ ჯიბესავით გამოგვივიდეს. ყველს ვჭრით იმ ზომის ნაჭრებად, რომ ფილეს ჯიბეში ჩაეტიოს. ბეკონის თხელ ნაჭრებში ვახვევთ ყველს, შემდეგ ორივე ქათმის ფილეში ვყრით მარილს, ცოტა წიწაკას, დაფქვილ ნიორს და შიგნით ვათავსებთ ყველიან ბეკონებს. ტაფას მაღალ ცეცხლზე კარგად ვაცხელებთ, ვასხამთ ცოტა ზეთს, ფილეებს ორივე მხრიდან გემოვნებით ვაყრით ცოტა მარილს, წიწაკას და ვდებთ ტაფაზე. ერთი წუთის შემდეგ ვაბრუნებთ ფილეს და ზემოდან ვუსვამთ მარინადს. ასევე ვიქცევით ფილეს მეორედ გადატრიალების დროსაც. ამის შემდგომ დაბალ ცეცხლზე პერიოდულად ვაბრუნებთ ფილეებს, სანამ კარგად არ შეიწვება, რასაც, დაახლოებით, 10 წუთი დასჭირდება. ფილეებს შეწვამდე ორიოდე წუთით ადრე გვერდით ვულაგებთ ტოსტის პურებს, რომლებიც წინასწარ სამკუთხედებად გვაქვს დაჭრილი და ერთად ვწვავთ. გარნირისთვის ვაკეთებთ მარტივ სალათას: პომიდორს ვჭრით კუბიკებად, ტარხუნას და მწვანე ხახვს - წვრილად, სალათის ფოთლებს კი - ჩვეულებრივად, ყველაფერს ვათავსებთ თასში, ვასხამთ სოიოს სოუსს, ცოტა ზეთს, მარილს. თუ მოგვრჩა ყველი, მასაც წვრილად ვჭრით და ვამატებთ სალათში. შემწვარ ქათმის ფილეს გვერდით ვუწყობთ ტოსტის შემწვარ პურებს, სალათს და კერძიც მზადაა. შენიშვნა: კერძის მომზადებას დაახლოებით, 25 წუთი დასჭირდება. სასურველია, გრილის ტაფაზე მოამზადოთ. ამ კერძის მომზადება, დაახლოებით, 6.30 ლარი დაგიჯდებათ. გემრიელად მიირთვით!..