ქალაქ ზუგდიდის №10 საბავშვო ბაღის რეაბილიტაცია მიმდინარე წლის 25 ივლისს დაიწყო. ამ დროისათვის ინფრასტრუქტურული სამუშაოების დიდი ნაწილი ჩატარებულია. სარეაბილიტაციო სამუშაოების ჩატარების დასრულება 10 სექტემბრისთვის იგეგმება.

„როგორც ცენტრალური, ასევე ადგილობრივი ხელისუფლების ერთ-ერთი პრიორიტეტი განათლების სფეროს განვითარებაა. ამ მიმართულებით ქვეყანაში რიგი ნაბიჯები გადაიდგა, დამკვიდრდა კომპლექსური მიდგომები. მნიშვნელოვანია სკოლამდელი სააღმზრდელო დაწესებულებების ხელშეწყობა, მათი განვითარების სტიმულირება და თანამედროვე სტანდარტების შექმნა. ჩვენმა მუნიციპალიტეტმა ბაღების პედაგოგებისთვის ხელფასები გაზარდა, კვებისა და სან.ნორმების ხარისხის მონიტორინგი გამკაცრდა, შენდება რამდენიმე ბაღი, ასევე მიმდინარეობს ბაღების მოძველებული ინფრასტრუქტურის რეაბილიტაცია. ქალაქის საკრებულოს, მერიისა და სამხარეო ადმინისტრაციის ერთობლივი მუშაობით, 2015 წელს დაიგეგმა 6 საბავშვო ბაღის რეაბილიტაცია და ერთი ახალი საბავშვო ბაღის მშენებლობა. მიმდინარე წელს სამუშაოებისთვის გამოყოფილია მილიონასიათასი ლარი. ქალაქ ზუგდიდში 2016 წლის ბოლოს ყველა ბაღი იქნება სრულიად რეაბილიტირებული თანამედროვე სტანდარტების შესაბამისად . ახალ სასწავლო წელს ბაღების აღსაზრდელებს დახვდებათ კეთილმოწყობილი გარემო, რაც მნიშვნელოვანია ჯანსაღი განვითარებისთვის “-აცხადებს საკრებულოს თავმჯდომარის მოადგილე გიორგი თოდუა.