ცნობილი ამერიკელი მსახიობი ემილ ჰირში Insurge Pictures-ის თანამშრომელზე თავდასხმისათვის 15 დღეს ციხეში გაატარებს. არასასიამოვნო ინციდენტი 25 იანვარს ღამის კლუბში კინოფესტივალი Sundance-ის დროს მოხდა, დაზარალებულმა დენიელ ბერნფელდმა პოლიციას მიმართა მას შემდეგ, რაც ემილი ყელში სწვდა და ძირს დააგდო, თვითმხილველები ამბობენ, რომ მსახიობი არაფხიზელ მდგომარეობაში იმყოფებოდა. ციხეში გასატარებელი დღეების გარდა ემილს 4,7ათასი დოლარის ოდენობის ჯარიმის გადახდა და 50 საათიანი საზოგადოებისათვის სასარგებლო საქმიანობის შესრულება მოუწევს. მსახიობმა 17 აგვისტოს საკუთარი დანაშაული აღიარა, კლუბში მომხდარი ინციდენტის მეორე დღეს ემილს არაფერი ახსოვდა, თუმცა აღნიშნა, რომ ის მხოლოდ თავს იცავდა, როდესაც დენიელი თავს დაესხა. ემილ ჰირშის ადვოკატმა განაცხადა, რომ მსახიობს მომხდარის შემდეგ ალკოჰოლი აღარ მიუღია და რომ ის ძალიან ნანობს თავის საქციელს. დაზარალებული კი უკმაყოფილოა დასჯის ფორმებით, მას მიაჩნია, რომ უფრო მკაცრები უნდა ყოფილიყვნენ მსახიობის მიმართ. ემილ ჰირშმა სამსახიობო კარიერა რვა წლის ასაკში დაიწყო, მან მონაწილეობა მიიღო ისეთ ფილმებში, როგორებიცაა: მეზობელი გოგონა, ალფა დოგი, იმპერატორის კლუბი, ველურ პირობებში, ორჯერ დაბადებული, გადარჩენილი და სხვა.