მეფრინველეობის ფაბრიკის ყოფილი მფლობელი სამეგრელო-ზემო სვანეთის საოლქო პროკურატურის თანამშრომლების ნაწილს გულგრილობასა და უყურადღებობაში ადანაშაულებს. მისი თქმით, ის პროკურატურაში დაიბარეს, თუმცა მან პროკურორებთან შეხვედრა ვერ მოახერხა. გარდა ამისა, ეთერ ცხადაია თავისი საქმის გადაკვალიფიცირებას ითხოვს და აცხადებს, რომ მას არა მხოლოდ მორალური, არამედ - მატერიალური ზიანიც მიადგა. „ტყუილს ვერ ვიტყვი, ერთხელ შემხვდა ოლქის პროკურორის მოადგილე ნონა თოლორაია. შემდეგ დამიბარეს და მოვედი 1 აგვისტოს, თავსხმა წვიმა იყო… ვუთხარი: ოლქის პროკურორთან გიზო უგულავასთან მინდა შეხვედრა მეთქი. მითხრეს: დაელოდე და მიგიღებსო… ამასობაში გავიდა სამი საათი. წარმოიდგინეთ, 89 წლის ქალი სამი საათი ვუცდიდი…ვფიქრობ, უბილავამ არ იცოდა, რომ ველოდებოდი, თორემ - მიმიღებდა. ის ძალიან თავაზიანი კაცია… მინდა ასვე გითხრათ, რომ ეს ეს ყველაფერი ნაციონალების ნაფლეთების ბრალია, რომლებიც აქ როლანდ ახალიას დროს მუშაობდნენ “, – თქვა ეთერ ცხადაიამ. ამასთან, ინდივიუალური მეწარმე შინაგან საქმეთა მინისტრს გიორგი მღებრიშვილს მიმართავს და ითხოვს, პირად კონტროლზე აიყვანოს მისი საქმე. ეთერ ცხდაიას ბრალდებებზე სამეგრელო-ზემო სვანეთის საოლქო პროკურატურაში კომენტარს არ აკეთებენ. ინდ. მეწარმე უკვე შვიდი წელია მეფრინველეობის ფაბრიკის ჩამორთმევის საქმის გამოძიებას ითხოვს. ფაბრიკის ჩამორთმევაში ის ყოფილი ხელისუფლების წარმომადგენლებს, მათ შორის, სამეგრელო-ზემო სვანეთის ყოფილ გუბერნატორს ზაზა გოროზიას ადანაშაულებს. ეთერ ცხადაია 2008 წელს საქართველოს პრეზიდენტის ინიციატივით შექმნილი შეღავათიანი კრედიტის პროგრამით დაფინანსებული მეწარმეა, რომელსაც მისივე მტკიცებით, პროექტით გათვალისწინებული თანხის მხოლოდ ნაწილი 180 000 ლარი ჩაერიცხა, რის გამოც იგი იძულებული გახდა პროექტი შეეჩერებინა. პროექტის ფარგლებში ეთერ ცხადაიას 500 000 - მდე ლარი უნდა მიეღო. შეუსრულებელი საქმიანობის გამო, მისივე თქმით , პენსია და ქონება დაუყადაღეს.