21 სექტემბერს ყოვლადწმინდა ღვთისმშობლის შობის დღეს, ზუგდიდის დადიანების სახელობის ისტორიულ-არქიტექტურული მუზეუმიდან ღვთისმშობლის შესამოსელს ერთი დღით ხობის ხარების დედათა მონასტერში გადააბრძანებენ. შესაბამისი ნებართვა საქართველოს კულტურისა და ძეგლთა დაცვის სამინისტრომ უკვე გასცა.

კულტურის სამინისტროში აღნიშნავენ, რომ მუზეუმის დირექტორი ლილი ბერაია თანახმაა სიწმინდე ერთი დღით ხობში გადააბრძანონ, თუმცა, მუზეუმის დირექტორმა 4 დღის წინ „აიპრესთან“ საუბრისას განაცხადა, რომ „ღვთისმშობლის შესამოსელის ყოველ წუთსა და წამს საცავიდან გატანა უპატივცემულობა და გაუფასურებაა იმ დიდი სიწმინდისა, რომელსაც ჩვენ ასე ვუფრთხილდებით. აქ გასათვალისწინებლია ისიც, რომ სიწმინდე ქსოვილია. ამ ქსოვილს დიდი მოკრძალება და მოვლა-პატრონობა სჭირდება. ტურინის მოსასხამი 10 ან 20 წელიწადში ერთხელ გამოაქვთ, ამისთვის მოკრძალებით ემზადებიან, სადაც მთელი მსოფლიოდან ჩადის ხალხი მის სანახავად“, – თქვა ლილი ბერაიამ.

„გაცნობებთ, რომ საქართველოს ძეგლთა დაცვისა და კულტურის სამინისტრო თანახმაა 2015 წლის 21 სექტებერს ღვთისმშობლის შობის დღესასწაულზე დადიანების სასახლის ისტორიულ არქიტექტურულ მუზეუმში დაცული სიწმინდეები და ღვთისმშობლის კვართი გადატანილი იქნას ხობის ხარების დედათა მონასტერში იმ პირობით, რომ სიწმინდეები სათანადოდ იქნება დაცული და წირვის დასრულებისთანავე დაბრუნდება მუზეუმში“ – განაცხადეს კულტურის სამინისტროში.