ჰოლივუდი არავის ინდობს, მათ შორის არც „ოსკაროსან“ ვარსკვლავებს. ენ ჰეთეუეიმ ერთ-ერთ ინტერვიუში განაცხადა, რომ მასზე ახალგაზრდა მსახიობების გამო, ხშირად როლებს არ აძლევენ: „ამის აღიარებას ვერ ვიტან, მაგრამ სიმართლეს ვერსად გავექცევი. როლების რაოდენობა სულ უფრო მცირდება, კონკურენცია კი, პირიქით - იმატებს. ჩემს კოლეგებს ვუყურებ, ყველანი ისეთი ლამაზები, მოდურები და ნიჭიერები არიან, ყველას გვიწევს, რომ ასეთები ვიყოთ“. თუმცა, მიუხედავად იმისა, რომ მისთვის საოცნებო როლებს უფრო ახალგაზრდა მსახიობებს აძლევენ, ენი დანებებას არ აპირებს და ცდილობს, ასაკის მატებაში დადებითი მხარეებიც დაინახოს: „ვერ ვიწუწუნებ, რადგან ამისგან გარკვეულ მოგებას ვიღებ. როდესაც 20 წლის ვიყავი, ზოგიერთ როლზე მე მეუბნებოდნენ უარს, მიზეზად კი, პატარა ასაკს მისახელებდნენ. ამიტომ, ალბათ, არ უნდა ვდარდობდე იმაზე, რომ 30-ს გადაცილებულ მსახიობს 20 წლის გოგონებს აღარ მათამაშებენ“, - აცხადებს ვარსკვლავი.