“ნაციონალური მოძრაობის“ წევრები ქალაქის ცენტრში ხეების მოჭრას ვანდალიზმად აფასებენ. საკრებულოს წევრმა ანი წითლიძემ ეს საკითხი საკრებულოს დღევანდელ სხდომაზე დააყენა და მთავრობას აღნიშნულ ფაქტზე განმარტება მოსთხოვა. მისი თქმით, ეს ხეები ასწლოვანია, მათ მოჭრას კი  საზოგადოებაში უარყოფითი რეაქცია და სოციალურ ქსელში აქტიური განხილვა მოჰყვა. ხელისუფლების განცხადებით,  ამ ჯიშის წიწვოვანი ხეები საფრთხეს უქმნიან მოქალაქეებს და ცენტრალური ბულვარის მიმდებარე ტერიტორიაზე მდებარე შენობა – ნაგებობებს, განსაკუთრებით -უამინდობისას. ხეების მოჭრის განკარგულება მერიამ შ.პ.ს „ლეო-444“-ის მომართვის საფუძველზე გასცა. აღნიშნული კომპანია ვალდებულებას იღებს იმავე ადგილზე სკვერი გააშენოს. ოპოზიციის წევრები გადაჭრილ ხეებზე დამოუკიდებელი ექსპერტიზის ჩატარებას, ასევე სპეციალური კომისიის შექმნას და აღნიშნული საკითხის დროულ შესწავლას ითხოვენ.