ზუგდიდში, საერთაშორისო სტანდარტების შესაბამისი, პირველი ველო-ბილიკების მოწყობა დაიწო. ქალაქ ზუგდიდის საკრებულოს თავმჯდომარის მერაბ ქვარაიას ინფორმაციით, მიმდინარე წელს ველო-ბილიკები მხოლოდ ცენტრალური ბულვარის გარშემო, ტროტუარებზე გაკეთდება, ხოლო მომავალ წელს - მათი მოწყობა ცენტრალურ ქუჩებშიც იგეგმება. „ჩვენ მიზნად დავისახეთ, რომ ზუგდიდი გახდეს ერთ-ერთი ქალაქი, რომელიც იქნება ველოსიპედის აქტიური მომხმარებელი“, - უთხრა რადიო „ათინათს“ მერაბ ქვარაიამ. ქალაქში ველო-ბილიკების გამოჩენამ ველომოყვარულები გაახარა, თუმცა მათ ადგილობრივ ხელისუფლებას პროცესის დაჩქარებისკენ მოუწოდეს. „ქუჩები ავტომობილებით გადატვირთულია და უსაფრთხოდ არ ვგრძნობ თავს. შეძლებისდაგვარად ვახერხებ ვიარო ველოსიპედით, თუმცა ბავშვებისთვის ეს ძალიან საშიშია“, - თქვა ველომოყვარულმა ნანა ჯაფარიძემ. ასოციაციის „ათინათი“ თანამშრომლები ადგილობრივი ხელისუფლების გადაწყვეტილებას მიესალმებიან და აცხადებენ, რომ ველო-ბილიკების მოწყობა და ცხოვრების ჯანსაღი წესის დამკვიდრება აუცილებელია. „თუ ინფრასტრუქტურა უფრო მოწესრიგდება და ველო-ბილიკები მთელ ქალაქში იქნება - ძალიან გაგვიხარდება. ყოველგვარი კადნიერების გარეშე ვიტყვი, რომ ასოციაცია „ათინათი“ იყო პირველი, ვინც ზუგდიდში ველოკულტურის შემოღებაზე ალაპარაკდა. პირველი ველო-ძეგლი ჩვენ დავდგით ბულვარში, მოვაწყვეთ ველო-სადგომი და ძალიან გვიხარია, რომ მოგვბაძა რამდენიმე სკოლამ და თვითონაც გააკეთეს ველო-სადგომი“, - თქვა ასოციაცია „ათინათის“ პროექტის “ცხოვრების ჯანსაღი წესი“ კლუბის კოორდინატორმა სალომე ჟვანიამ.