ქალაქ ზუგდიდის საკრებულოს ოპოზიციური პარტიის დეპუტატები მერიის შესყიდვების სამსახურის ხელმძღვანელებისგან ე.წ. „ჩავარდნილი“ და გამარტივებული შესყიდვების მოთხოვნების გაზრდასთან დაკავშირებით, განმარტებებს ითხოვენ. დეპუტატებმა მოთხოვნა, მას შემდეგ დააყენეს, რაც მერიამ  გამარტივებული შესყიდვის განხორციელებაზე თანხმობა დღეს გამართულ სხდომაზე 2-ჯერ ითხოვა. კერძოდ, მერიამ დღეს გამარტივებული შესყიდვა ლიფტის შეკეთებაზე (450ლარი ღირებულების) და სოფელ ჩხორიაში ფეხბურთის სტადიონის მშენებლობის დასრულებაზე (შესყიდვის ღირებულება 18 900 ლარი) მოითხოვა. „ეს ისევ თქვენი - უმრავლესობის  პრობლემა იქნება, ჩვენი კი არა. ლოგიკურად ვსვამთ შეკითხვას: რას აკეთებს შესყიდვების სამსახური? იქნებ მოვიდნენ გვითხრან... იქნებ ჩვენი დახმარება სჭირდებათ....რატომ უარდებათ ამდენი ტენდერი?  ეს ხომ შემთხვევით არ ხდება? ან რატომ ითხოვენ ამდენ გამარტივებულ შესყიდვას? - თქვა სხომაზე „ნაციონალური მოძრაობის“ წევრმა ანა წითლიძემ. გარდა ამისა, დეპუტატმა  „ნაციონალური მოძრაობიდან“ ლევან კონჯარიამ, ასევე ეჭქვეშ დააყენა ზუგდიდში სტადიონის მშენებლობაზე გამოცხადებული ტენდერის საკითხი. „ორჯერ ჩავარდა სტადიონის მშენებლობაზე 9 მილიონის ღირებულების ტენდერი. შესაძლებელია მერიამ ამაზეც შემოგვთავაზოს გამარტივებული შესყიდვა“, -თქვა წინა მოწვევის საკრებულოს თავმჯდომარე ლევან კონჯარიამ. ყოფილი მმართველი პარტიის წარმომადგენლებს საკრებულოს თავმჯდომარემ უპასუხა და თქვა, რომ გამარტივებული შესყიდვების მოთხოვნის მიზანშეწონილობაზე მსჯელობა შეიძლება, თუმცა ზოგიერი ეჭვი რეალურ საფუძვლებს მოკლებულია.