„ნაციონალური მოძრაობის“ ზუგდიდის ორგანიზაციის წევრის თეიმურაზ ბასილაიას ინფორმაციით, სამეგრელოს რეგიონიდან ქუთაისში რუსთავის 2-ის მხარდამჭერ აქციაზე დაკავებულების მხარდასაჭერად 200-ზე მეტი ადამიანი გაემგზავრა.  მისივე თქმით, ქუთაისში საპროტესტო აქცია 11:30 საათზე დაიწყება. „სოლიდარობას ვუცხადებთ დაკავებულებს, ეს ბიჭები სრულიად უდანაშაულოები არიან. ასევე, მხარდაჭერას ვუცხადებთ რუსთავი 2-ს და ზოგადად თავისუფალ მედიას", - თქვა თეიმურაზ ბასილაიამ. რუსთავი 2-ის მხარდამჭერ აქციაზე დაკავებულების სასამართლო პროცესი ერთ საათში დაიწყება. ნიკა ნარსიას, მირიან დეისაძესა და კახა გაბუნიას ხულიგნობაში ადანაშაულებენ. მათ ბრალი ოფიციალურად უკვე წარედგინათ. მუხლი, რომლის მიხედვით გამოძიება მიმდინარეობს 3-დან 7 წლამდე პატიმრობას ითვალისწინებს. დაკავებულები და მათი ახლობლები პროტესტის ნიშნად შიმშილობენ.