Twitter-მა განაცხადა, რომ 336 სამუშაო ადგილს ამცირებს. ეს 4-ათასიანი შტატის 8%-ია და შემცირება კომპანიის ყველა განყოფილებას შეეხება. ამ გზით, კომპანიის დამფუძნებელი ჯეკ დორსი, რომელიც წინა კვირას Twitter-ის ახალი აღმასრულებელი დირექტორი გახდა, ხარჯების ოპტიმიზაციას შეეცდება. Twitter-ი 2006 წელს შეიქმნა და 2012 წელს საფონდო ბირჟაზე გავიდა და ის ერთ-ერთი ყველაზე პოპულარული სოციალური ქსელია დღეს. თუმცა, კომპანია თავისი პოპულარობის მონეტიზაციას ვერ ახერხებს. გასულ წელს Twitter-ის წმინდა ზარალმა $577 მლნ შეადგინა, ამ წლის პირველ კვარტალში - $162 მლნ და მეორეში - $137 მლნ. მიკრობლოგების სერვისს 316 მლნ აქტიური მომხმარებელი ჰყავს და აუდიტორიის ზრდის ტემპების მიხედვითაც ჩამორჩება კონკურენტ ქსელებს, Facebook-ს და Instagram-ს.