შინაგან საქმეთა სამინისტროს პრესსამსახურის ცნობით, წამების ამსახველი კადრების საჯარო ჩვენებასა  და გავრცელებასთან დაკავშირებით გამოძიება არ დაწყებულა. რადიო "ათინათის"  კითხვაზე, თუ რატომ არ არის გამოძიება ამ დრომდე დაწყებული, უწყებაში აცხადებენ, რომ „ამ ეტაპზე მხოლოდ ამის თქმა შეუძლიათ“. შინაგან საქმეთა სამინისტრომ 17 ოქტომბერს, სწორედ იმ დღეს, როდესაც წამების ამსახველი ახალი კადრები გავრცელდა, განცხადება გააკეთა. „შინაგან საქმეთა სამინისტროს ცენტრალური კრიმინალური პოლიციის დეპარტამენტმა 17 ოქტომბერს პირადი ცხოვრების ამსახველი ვიდეომასალის მედიასაშუალებით გავრცელებასთან დაკავშირებით გამოძიება დაიწყო. გამოძიება საქართველოს სსკ-ს 157-ე მუხლის მე-2 ნაწილით მიმდინარეობს (პირადი ცხოვრების ამსახველი ინფორმაციის უკანონოდ გავრცელება ინტერნეტის, მათ შორის, სოციალური ქსელის, მასობრივი მაუწყებლობის ან სხვა საჯარო გამოსვლის მეშვეობით, რამაც მნიშვნელოვანი ზიანი გამოიწვია)“ - იუწყებოდა მაშინ შსს-ს ოფიციალური ვებ- გვერდი. წამების ამსახველი ვიდეო კადრები უკრაინულ პორტალზე გავრცელდა. მათი საჯარო ჩვენება ზუგდიდსა და თბილისში მოეწყო. კადრების ჩვენება ზუგდიდში მოძრაობა „საზოგადოებრივი დარბაზის“ მიერ იყო ორგანიზებული.