საპარლამენტო უმრავლესობის წევრი ირაკლი ჩიქოვანი აცხადებს, რომ მთავრობის ყველაზე უკეთესი შემფასებელი ის ერთი წელია, რა პერიოდიც მათ მთავრობაში გაატარეს. დეპუტატის თქმით, თითეულ სფეროში ძალიან მნიშვნელოვანი გარღვევა და პროგრესია. „ეს იწყება სამართალდამცავი სფეროდან და გრძელდება ჩვენს ეკონომიკურ ბლოკშიც. რეალობა არის ის რომ, დღეს საქართველოში გაცილებით უფრო მეტი ადამიანია დასაქმებული, გაცილებით უფრო მეტ ადამიანს აქვს ჯანდაცვის უზრუნველყოფა, დღეს საქართველოში გაცილებით უფრო მეტმა გლეხმა დაამუშავა საკუთარი მიწა. ასე შეიძლება ძალიან ბევრი მიმართულებით გავაგრძელოთ“,-აღნიშნა ჩიქოვანმა. მისივე თქმით, საკმაოდ მნიშვნელოვანია ის ფაქტორი, რომ მთავრობა არის გუნდი, რომელიც ყოფილმა პრემიერმინისტრმა ბიძინა ივანიშვილმა შეკრა. დეპუტატი დარწმუნებულია, რომ მთავრობა მუშაობას ეფექტურად გააგრძელებს. მან შინაგან საქმეთა ახალ მინისტრზე, ალექსანდრე ჭიკაიძეზეც ისაუბრა და აღნიშნა, რომ ჭიკაიძეს, ახალგაზრდობის მიუხედავად, პოლიციაში მუშაობის საკმაოდ მნიშვნელოვანი გამოცდილება აქვს. „დარწმუნებული ვარ, რომ შს მინისტრი თავის გუნდთან ერთად შეძლებს სისტემის იმ მიმართულებით განვითარებას, რა მიმართულებითაც ირაკლი ღარიბაშვილმა დაიწყო ეს ყველაფერი და ის იქნება წარმატებული“,-აღნიშნა დეპუტატმა.