ევროსაბჭოს პრეზიდენტ ჰერმან ვან რომპეის განცხადებით, ვილნიუსის სამიტი სამეზობლო პოლიტიკისა და აღმოსავლეთ პარტნიორობის პირველ ოთხ წელიწადს დაასრულებს."ჩვენი მიზანია, ვიმუშაოთ ჩვენ პარტნიორებთან ერთად დემოკრატიისა და სტაბილურობის გასაძლიერებლად, რომელიც ეფუძნება სამართლიანობას. ვილნიუსის სამიტი დაასრულებს პირველ დეკადას, სამეზობლო პოლიტიკისა და აღმოსავლეთ პარტნიორობის პირველ ოთხ წელიწადს. გავაგრძელებთ ასოცირებისა და თავისუფალი ვაჭრობის შესახებ ხელშეკრულებაზე მუშაობას ჩვენ პარტნიორებთან ერთად, ასევე ნაბიჯების გადადგმას ვიზის ლიბერალიზაციისკენ", - განაცხადა რომპეიმ. ევროკომისიის პრეზიდენტის ჟოზე მანუელ ბაროზოს განცხადებით, "აღმოსავლეთ პარტნიორობა სომხეთის, აზერბაიჯანის, ბელორუსიის, საქართველოს, მოლდოვასა და უკრაინის მოქალაქეებს ცვლილებითა და ახალი პერსპექტივით უზრუნველყოფს". "იგი არის გაცილებით დიდი ტრანსფორმაციის ნაწილი, რომელსაც ადგილი აქვს ევროკავშირის საზღვრებში. ბოლო რამდენიმე წლის განმავლობაში, ევროკავშირი გახდა ყველაზე დიდი სავაჭრო პარტნიორი და ინვესტიციების წყარო, პოლიტიკური წარმომადგენელი და საიმედო პარტნიორი ჩვენი აღმოსავლელი მეზობლების დიდი ნაწილისთვის. საბოლოო ჯამში, ევროპასა და აღმოსავლეთ პარტნიორებს შეუძლიათ მხოლოდ აღორძინდნენ, როგორც ინტეგრირებული კონტინენტი, გამყოფი ხაზების გარეშე", - განაცხადა ბაროზომ.აღმოსავლეთ პარტნიორობის სამიტი ვილნიუსში 28-29 ნოემბერს გაიმართება. სამიტს ევროსაბჭოს პრეზიდენტ ჰერმან ვან რომპეისთან ერთად ევროკომისიის პრეზიდენტი ჟოზე მანუელ ბაროზო უხელმძღვანელებს.სამიტს ლიტვის პრეზიდენტი დალია გრიბაუსკაიტე უმასპინძლებს. 6 პარტნიორ ქვეყანას წარმოადგენენ – საქართველოს პრეზიდენტი გიორგი მარგველაშვილი, სომხეთის პრეზიდენტი სერჟ სარქისიანი, აზერბაიჯანის პრეზიდენტი ილჰამ ალიევი, უკრაინის პრეზიდენტი ვიქტორ იანუკოვიჩი, მოლდოვის პრემიერ-მინისტრი იური ლიენსა და ბელორუსიის საგარეო საქმეთა მინისტრი ვლადიმერ მაკეი.ამასთან, სამიტზე ხელი მოეწერება ჩარჩო ხელშეკრულებას, რომელიც ევროკავშირის კრიზისის მართვის ოპერაციებში საქართველოს მონაწილეობას გულისხმობს.