ასეულობით ადამიანი მონაწილეობდა საპროტესტო გამოსვლაში ერევანში, ორშაბათს,  რუსეთის პრეზიდენტის ვლადიმირ პუტინის სომხეთში ჩასვლის დღეს. ამ ქვეყანაში პუტინის ვიზიტის დაწყების დღეს მოწყობილი გამოსვლის მონაწილეები პროტესტს გამოთქვამენ  მოსკოვის წანამძღოლობით მოქმედ  „საბაჟო კავშირში“  სოხეთის გაერთიანების სურვილის წინააღმდეგ.  დემონსტრანტებს ხელში ეჭირათ პლაკატები: „გააჩერეთ რუსეთი“, „პუტინ, შინ წადი!“, „სერჟ წადი აქედან!“.  პოლიციამ  პრეზიდენტის სასახლისკენ  მსვლელობას გზა გადაუკეტა და განაცხადა, რომ დემონსტრაციის ორგანიზატორებს არ ჰქონდათ მსვლელობის მოწყობის  უფლება.  პუტინი ორშაბათს ქალაქ გიუმრიში ჩავიდა, სადაც რუსეთის სამხედრო ბაზას ეწვევა და ბიზნესმენთა შეხვედრას დაესწრება. სტუმარი რუსეთიდან რაზდანის თბოელექტროსადგურის ახალი სექციის გახსნის ცერემონიაზეც მივა. რუსეთი ამიერავკასიაში თავისი პოზიციების გამყარებას აპირებს, განაცხადა პუტინმა, გიუმროში მიმდინარე რუსულ-სომხურ ფორუმზე. "რაც შეეხება ამიერკავკასიას, რუსეთს არასოდეს უფიქრია აქედან წასვლა, – ხაზი გაუსვა პუტინმა - პირიქით, ჩვენ ამიერკავკასიაში ჩვენი პოზიციების გამყარებას ვგეგმავთ“ რუსეთის პრეზიდენტის, ვლადიმირ პუტინის განცხადებით, "საბაჟო კავშირში და ერთიან ეკონომიკურ სივრცეში მონაწილეობას რუსეთისთვის, ბელორუსისთვის და ყაზახეთისთვის უკვე მოაქვს საგრძნობი დივიდენდები", - აღნიშნა პუტინმა. მანამდე, სექტემბერში, სომხეთის ხელისუფლებამ საბაჟო კავშირში გაერთიანების განზრახვის შესახებ განაცხადა. ევროკავშირმა ერევნის ამ გადაწყვეტიელბასთან დაკავშირებით იმედგაცრუება გამოხატა. მოგვიანებით პუტინი ერევანში ჩავა, სადაც ბელორუსიის, ყაზახეთის და რუსეთის  „საბაჟო კავშირის“ გარშემო იმსჯელებს სომეხ კოლეგასთან, სერჟ სარქისიანთან ერთად.