სიების დაზუსტების სახელმწიფო კომისიის მიერ დღეს წარმოდგენილი "კარდაკარის" მონაცემები მხოლოდ კომისიის მუშაობის შედეგებს ასახავს, - ამის შესახებ სიების დაზუსტების სახელმწიფო კომისიის თავმჯდომარე მამუკა კაციტაძემ  განაცხადა. მისივე თქმით, ალტერნატიული კარდაკარის ორგანიზატორებს კომისიისთვის არ მიუმართავთ და არც ერთი უზუსტობის შესახებ ინფორმაცია არ მოუწოდებიათ. ალტერნატიულ კარდაკარს "ამომრჩეველთა ლიგა" და კოალიცია "ქართული ოცნება" ერთდროულად ატარებს. პარლამენტის თავმჯდომარის დავით ბაქრაძის განცხადებით, ამომრჩეველთა სია დღევანდელი მდგომარეობით, იძლევა იმის რწმენას რომ სიები არის ზუსტი და საქართველოში ჩატარდება დემოკრატიული არჩევნები. "საარჩევნო სიების თემა ტრადიციულად იყო ერთ-ერთი მტკივნეული პრობლემა საქართველოში ყველა არჩევნების დროს. ის სამუშაო რომელიც გაატარა ამომრჩეველთა სიების დაზუსტების კომისიამ ვფიქრობ რომ ერთხელ და სამუდამოდ წერტილს უსვამს ნებისმიერ სპეკულაციას იმის თობაზე, თუ რამდენად ზუსტია საარჩევნო სიები საქართველოში. ეს არის ძალიან დიდი წინგადადგმული ნაბიჯი ოქტომრბის არჩევნებში. კომისია მუშაობას გააგრძელებს, რათა ნებისმიერი შემდგომი შესწორება იყოს ასახული საარჩევნო სიებში. უკვე დღეის მდგომარეობით ის სამუშაო რომელიც შესრულებულია, იძლევა იმის რწმენას, რომ სიები არის ზუსტი და საქართველოში იქნება ობიექტური არჩევნები"-აღნიშნა ბაქრაძემ. კარდაკარის შედეგების მიხედვით ამომრჩეველთა ერთიან სიაში ამ დროისთვის რეგისტრირებულია 3 483 143 ამომრჩეველი. აქიდან 2 160 608 ამომრჩეველის მონაცემი არის ზუსტი. ამომრჩეველთა სიების დაზუსტების უზრუნველყოფის კომისიამ ასევე დაადგინა ის თუ რამდენია გამოტოვებული ამომრჩეველი ამომრჩეველთა ერთიან სიაში. ასევე კომისიას აქვს ინფორმაცია გარდაცვლილთა შესახებ და სიაში აღმოჩნდა 25 949 გარდაცვლილი, საზღვარგარეთ კი არის 200 ათასზე მეტი ადამიანი, ხოლო შიდა მიგრაციაში არის 649 839 ადამიანი. მამუკა კაციტაძის განცხადებით, კომისია სიების დაზუსტებას კიდევ ერთი თვის განმავლობაში გააგრძელებს. პირველ სექტემბრამდე კომისია სიების დაზუსტების მიზნით მოსახლეობის მიმართვებს შეისწავლის და გაითვალისწინებს. კაციტაძის თქმით, სრული სახით სია 15 სექტემბერს იქნება წარმოდგენილი.