რუსეთის მხარემ ვადაზე ადრე გაათავისუფლა საქართველოს ორი მოქალაქე, რომლებიც რუსეთში სასჯელს ჯაშუშობის ბრალდებით იხდიდნენ. როგორც დღეს გამართულ პრესკონფერენციაზე საქართველოს პრემიერ-მინისტრის სპეციალურმა წარმომადგენელმა, ზურაბ აბაშიძემ განცხადა, მათ 8 და 9 წელი ჰქონდათ მისჯილი და საკმაოდ ცუდი პერსპექტივით. "ისინი რუსეთის მხარემ გაათავისუფლა და უკვე საქართველოში, თავის ოჯახებთან იმყოფებიან. დარჩა კიდევ რამდენიმე მოქალაქე და ჩვენ ვმუშაობთ მათ გათავისუფლებაზეც",-აღნიშნა ზურაბ აბაშიძემ, თუმცა გათავისუფლებულთა ვინაობა არ დააკონკრეტა. "ჩვენ ამ თემას არ ვაპიარებდით და ოპონენტების კრიტიკას არ ვპასუხობდით, მაგრამ უკვე გვაქვს კონკრეტული შედეგი. ეს არის პასუხი იმ კრიტიკაზეც, რომ რუსეთთან დიალოგი საჭირო არ არის. ეს არის სწორედ ამ დიალოგის ერთ-ერთი შედეგი. დარწმუნებულები ვართ, სხვა დაკავებულებთან დაკავშირებითაც ანალოგიური გადაწყვეტილება იქნება მიღებული",- განაცხადა აბაშიძემ. მისი ინფორმაციით, გათავისუფლებული ორი პირი რუსულმა მხარემ 2008 წლის აგვისტოს ომის შემდეგ დააკავა.