საქართველოს პრემიერ-მინისტრის ირაკლი ღარიბაშვილისა და აშშ-ის პრეზიდენტის ბარაკ ობამას ვაშინგტონში გამართულ შეხვედრას თეთრი სახლი ეხმაურება. როგორც თეთრი სახლის მიერ გავრცელებულ განცხადებაშია აღნიშნული, აშშ-ის პრეზიდენტმა და ვიცე-პრეზიდენტმა საქართველოს პრემიერ-მინისტრს ქვეყანაში პირველი მშვიდობიანი და ხელისუფლების დემოკრატიული გზით გადაბარების წარმატებით დასრულება მიულოცეს. ამასთან, აშშ-ის პრეზიდენტმა და ვიცე-პრეზიდენტმა მოუწოდეს საქართველოს პრემიერ-მინისტრს, რომ თანამშრომლობა გააგრძელოს საქართველოს ყველა ლიდერთან და სამოქალაქო საზოგადოებასთან კანონის უზენაესობის განმტკიცებისა და საქართველოს მნიშვნელოვანი დემოკრატიული მიღწევების კონსოლიდაციისთვის. თეთრი სახლის ინფორმაციით, აშშ-ის ხელისუფლებამ მადლობა გადაუხადეს საქართველოს ღირსეული მეგობრობისა და საიმედო პარტნიორობისთვის, რაც შეერთებული შტატებისთვის ყველაზე მნიშვნელოვანი რეგიონული და გლობალური პრიორიტეტების მხარდაჭერაში გამოიხატება. ამასთან, აშშ-ის პრეზიდენტმა მადლიერება გამოხატა ავღანეთში, ნატო-ს მისიაში საქართველოს მნიშვნელოვანი წვლილისთვის და პატივი მიაგო ქართველი სამხედროებისა და მათი ოჯახების მიერ გაღებული მსხვერპლს. თეთრი სახლის ინფორმაციით, პრეზიდენტმა და საქართველოს პრემიერ-მინისტრმა განიხილეს აშშ—ის საქართველოს სტრატეგიული თანამშრომლობის განმტკიცების შესაძლებლობა, მათ შორის სავაჭრო და საინვესტიციო კავშირების ზრდა ორი ქვეყნის ეკონომიკებს შორის. "აშშ-ის პრეზიდენტმა და ვიცე-პრეზიდენტმა დაადასტურეს ძლიერი მხარდაჭერა საქართველოს დამოუკიდებლობისა და მისი ტერიტორიული მთლიანობისადმი, მის საერთაშორისო აღიარებულ საზღვრებში. მათ დაარწმუნეს საქართველოს პრემიერ-მინისტრი, რომ აშშ მხარს უჭერს ქართველი ხალხის ევროატლანტიკურ მისწრაფებას და დაპირდნენ, რომ აშშ-ი გააგრძელებს საქართველოს ახალი მთავრობის დახმარებას პოლიტიკური, ეკონომიკური და თავდაცვის სფეროში რეფორმების განხორციელებაში", - ნათქვამია თეთრი სახლის მიერ გავრცელებულ განცხდებაში.