როგორ შეიძლება "ნაციონალური მოძრაობა" ხალხს ეჯავრებოდეს და "ქართული ოცნება" უყვარდეს, მათში რამე განსხვავებას ხედავთ? , - ამის შესახებ განცხადება დღეს გამართულ ბრიფინგზე ადვოკატთა ასოციაციის თავმჯდომარე, ზაზა ხატიაშვილმა გააკეთა. როგორც ხატიაშვილა აღნიშნა, ადვოკატთა კორპუსი მას გოგა ონიანის დაკავების გამო გაკეთებული შეფასებისას დაუპირისპირდა. "ხელისუფლება შეეცადა ჩემი რეპუტაციის შელახვას, როდესაც მე გავაკეთე განცხადება გოგა ონიანთან მიმართებაში, რომ იგი არის პოლიტიკური ნიშნით დაკავებული. ვინაიდან გოგა ონიანი დაკავებული იყო, როგოც უკანონო დაკავების ორგანიზატორი, ხოლო ვინც დააკავა ისინი გვევლინებიან მოწმედ, არ შეიძლება იურისპრუდენციაში არსებობდეს ცნება - კანონიერი დაკავების უკანონო ორგანიზატორი. ეს არის პოლიტიკური ბრალდება. ადვოკატთა კორპუსი დამიპირისპირდა და დადასტურდა, რომ მე ვარ მართალი. დადასტურდა, რომ გოგა ონიანის პირადი ჩხრეკვა და ბინის ჩხრეკვა მოხდა უკანონოდ. რაღა უნდათ ამ ადვოკატებს თუ ეს არ არის ჩემს წინააღმდეგ სახელმწიფოსგან აგორებული კამპანია?", - აღნიშნა ზაზა ხატიაშვილმა იმ ადვოკატების მისამართით, ვინც მის წინააღმდეგ განცხადებებს აკეთებს. ადვოკატთა ასოციაციის თავმჯდომარის თქმით, იგი არც ერთ ხელისუფლებასთან ალიანსში არ ყოფილა. "ადვოკატები გამოვიდნენ და თქვეს, რომ ზაზა ხატიაშვილი "ნაციონალების" დასაყრდენიაო, რადგან გოგა ონიანი დაიცვაო. თქვენ მაგალითად არ გეამაყებათ, რომ მე არც ერთ ხელისუფლებასთან ალიანსში არ ვიყავი? ყველას ვეუბნები, რომ თქვენ ხართ სამოქალაქო საზოგადოების მტრები. როგორ შეიძლება "ნაციონალური მოძრაობა" ხალხს ეჯავრებოდეს და "ქართული ოცნება" უყვარდეს? ამათში რამე განსხვავებას ხედავთ თქვენ? მითხარით ერთი განსხვავება სააკაშვილის რეჟიმსა და ბიძინა ივანიშვილის და ღარიბაშვილის რეჟიმს შორის. პოლიტიკური ნიშნით დაკავებები იყო და პოლიტიკური ნიშნით დაკავებები არის", - განაცხადა ზაზა ხატიაშვილმა.