"დემოკრატიული მოძრაობა – ერთიანი საქართველოს" ლიდერმა ნინო ბურჯანაძემ განაცხადა, რომ აშშ–ის პრეზიდენტის ბარაკ ობამას განცხადება, რომ საქართველო არ დგას ნატოს წევრობის გზაზე  სწორედ ის არის, რასაც იგი უკვე წლებია ეუბნება ამომრჩევლებს. ბურჯანაძის თქმით, „ამ პროპაგანდის მიხედვით, ალბათ სწორი იქნება ველოდოთ იმას, რომ "ნაციონალური მოძრაობა" აშშ-ის პრეზიდენტს ბარაკ ობამას გამოაცხადებს პრორუსულ პოლიტიკოსად, პუტინის აგენტად და პუტინის დაკვეთების შემსრულებლად“. „ჩემს მიერ გაკეთებული ეს განცხადება სულაც არ ნიშნავს იმას, რომ მე ძალიან აღფრთოვანებით ვაკეთებ კომენტარს იმაზე, რაზეც ახლა ვსაუბრობ, მაგრამ უნდა ვთქვათ, რომ აშშ-ის პრეზიდენტის გუშინდელი განცხადება, რომ საქართველო არ დგას ნატოში გაწევრიანების გზაზე და არ არის ნატოს დაუყოვნებელი გაფართოების გეგმა, არის სიმართლე“, – განაცხადა ბურჯანაძემ, რომლის პარტიაც ქრისტიან–დემოკრატიულ მოძრაობასთან ერთად გეგმავს ივნისის ადგილობრივ არჩევნებში მონაწილეობას. „ეს არის სიმართლე, რომელსაც მე ვეუბნებოდი ჩვენს თანამოქალაქეებს, მიუხედავად იმისა, რომ მე ამის თქმა ძალიან ძვირად მიჯდებოდა, მაგრამ სიმართლე, რომელსაც ხალხს უმალავდა როგორც წინა, ისე ახალი ხელისუფლება“, – განაცხადა მან. თუმცა, იგი ასევე მიესალმა პრემიერ–მინისტრ ღარიბაშვილის „ადეკვატურ“ პოზიციას ობამას განცხადების საპასუხოდ. ღარიბაშვილმა განაცხადა, რომ „მცდარი მოლოდინები“ არ უნდა გაჩნდეს საქართველოს ნატოში დაუყონებლივ გაწევრიანებასთან დაკავშირებით  და რომ აშშ–ის პრეზიდენტის განცხადება ამ თვალსაზრისით იყო „აბსოლუტურად ადეკვატური“ და რეალისტური. ნაციონალურმა მოძრაობამ გააკრიტიკა პრემიერ–მინისტრის კომენტარი და მას „საგანგაშო“ უწოდა. თუმცა, ბურჯანაძემ მთავრობის სხვა წევრების განცხადებები გააკრიტიკა და მათ „დაბნეული, უსუსური და არაპროფესიონალური“ უწოდა. ობამას განცხადებაზე კომენტირებისას საქართველოს საგარეო საქმეთა მინისტრმა მაია ფანჯიკიძემ განაცხადა, რომ აშშ–ის პრეზიდენტს არ უთქვამს, რომ საქართველო არ დგას ნატოს გზაზე; ფანჯიკიძემ ასევე დასძინა, რომ „საქართველო მტკიცედ მიდის ნატოსკენ გზაზე... და ამისი საწინააღმდეგო არავის არაფერი არ უთქვამს“. ბურჯანაძის თქმით, არც მოსახლეობა და არც რომელიმე პოლიტიკოსი არ უნდა იყოს ან პრო–დასავლური ან პრო–რუსული, არამედ ისინი ქართული ორიენტაციის უნდა იყვნენ და მათ ქართული ინტერესები უნდა ამოძრავებდეს.