თბილისის ყოფილი მერის, გიგი უგულავას განცხადებით, წინასაარჩევნოდ ხელისუფლება თავისი უნიათობის გადაფარვას ცდილობს და პოლიტიკურ ოპონენტებს მართული აქციებით უპირისპირდება. როგორც ბათუმში გამართულ პრესკონფერენციაზე გიგი უგულავამ განაცხადა, ისინი გაჩერებას არ აპირებენ. "კვერცხით, კარტოფილით თუ სხვა პროდუქტებით შეიარაღებული ხალხი რომც მოიყვანონ, ჩვენ არ გავჩერდებით. გამოსავალი არის, ან ტყვია გვესროლეთ ან ციხეში ჩაგვსვით, სხვაგვარად არ გავჩერდებით. ჩვენ მზად ვართ პოლიტიკური ოპონირებისთვის, პასუხისმგებლობა ავიღეთ იმ ათ წელიწადზე, რაც ყოფილა კარგიც და ცუდიც, მაგრამ ჩვენ ვხედავთ, რომ რაც კარგი იყო ქვეყანაში, გაჩერდა, რაც ცუდი იყო გაათკეცდა. დღევანდელი "ქართული ოცნება" თავისი ნაბიჯებით ემსგავსება იმ ბნელ მხარეს, რომელიც ჩვენ ერთად უნდა დაგვევიწყებინა. ის შურისძიების მუხტი, რომელსაც ივანიშვილი და ღარიბაშვილი აღვივებენ, წალეკავს პირველ რიგში მათ", - აღნიშნა გიგი უგულავამ. მისი განცხადებით, აღნიშნული აქციები ორგანიზებული იყო შინაგან საქმეთა სამინისტროს მიერ განხორციელებული მოსმენების შედეგად. წინააღმდეგ შემთხვევაში, აქტივისტები ხუთ ქალაქში ერთდროულად და ორგანიზებულად ვერ გამართავდნენ აქციებს. გიგი უგულავას გუშინ, ბათუმში საკონსტიტუციო სასამართლოს შენობიდან გამოსვლისას კვერცხები ესროლეს. გარდა ამისა, ნაციონალური მოძრაობის წევრებს კვერცხები თელავში, ზუგდიდში და ქუთაისსშიც დაუშინეს.