საქართველოს რეგიონული განვითარებისა და ინფრასტრუქტურის მინისტრის შემცვლელთან დაკავშირებით კონსულტაცია მიმდინარეობს. ამის შესახებ მინისტრის რანგში გამართულ ბოლო შემაჯამებელ პრესკონფერენციაზე დავით ნარმანიამ განაცხადა. მისი თქმით, კანდიდატის დასახელების ექსკლუზიური უფლებამოსილება პრემიერ-მინისტრს აქვს. რაც შეეხება მის მიერ თანამდებობის დატოვებას, ნარმანია განმარტავს, რომ ეს ადგილობრივი თვითმმართველობის არჩევნების თარიღის ოფიციალურად გამოქვეყნებისთანავე მოხდება. „ჩემი ბოლო საჯარო ანგარიში იმას ნიშნავს, რომ ნელ-ნელა მოახლოვდა ის დრო, როცა თანამდებობა უნდა დავტოვო. თუმცა ამისათვის შესაბამისი პროცედურები არსებობს, რომელთა დაცვითაც ეს ყველაფერი უნდა მოხდეს. ეს იმას ნიშნავს, რომ საარჩევნო თარიღი ოფიციალურად უნდა გამოქვეყნდეს და ჩემი კანდიდატურა ოფიციალურად დასახელდეს. სწორედ ამის შემდეგ დავტოვებ თანამდებობას. კონკრეტული დღის და საათის დასახელება გამიჭირდება, მაგრამ ეს უახლოესი დღეების განმავლობაში მოხდება“, _ განაცხადა დავით ნარმანიამ. რაც შეეხება ჟურნალისტების შეკითხვას გავრცელებულ ინფორმაციაზე, რომლის თანახმადაც, ნარმანია თანამდებობიდან წასვლის შესახებ განცხადების დაწერას დამდეგი ორშაბათისთვის აპირებს, იგი აღნიშნავს: „დაველოდოთ ორშაბათს“. შეგახსენებთ, რომ დავით ნარმანია კოალიცია „ქართული ოცნების“ მიერ დასახელებული, თბილისის მერობის კანდიდატია. საარჩევნო კამპანის მოქმედი კანონმდებლობით, საარჩევნო კამპანიის დაწყებამდე მან რეგიონული განვითარებისა და ინფრასტრუქტურის მინისტრის თანამდებობა უნდა დატოვეს.