რუსეთის შემდგომ ქმედებებს, რომელიც მიმართული იქნება უკრაინის დესტაბილიზაციისკენ, შედეგები მოჰყვება აშშ-ისა და ევროპის მხრიდან. ამის შესახებ აშშ-ის პრეზიდენტმა ბარაქ ობამამ ტელეკომპანია CBS-სთვის მიცემულ ინტერვიუში განაცხადა. "ყოველ ჯერზე, როდესაც რუსეთი უკრაინის დესტაბილიზაციისა და სუვერენიტეტის დარღვევისკენ მიმართულ ნაბიჯებს გადადგამს, ამას შედეგები ექნება. სანქციების მოქმედებები უკვე სახეზეა, რამეთუ მათ შეასუსტეს რუსეთის ეკონომიკა, აღინიშნება ქვეყნიდან კაპიტალების გადინება. ბატონი პუტინის გადაწყვეტილებები ცუდად აისახება არა მხოლოდ უკრაინაზე, არამედ გრძელვადიან პერსპექტივაში მას ცუდი გავლენა ექნება რუსეთზე", - აღნიშნა აშშ-ის პრეზიდენტმა. ამასთან, ტელეკომპანია CBS-სთან საუბრისას ბარაქ ომამა განაცხადა, რომ რუსეთი მხარს უჭერს უკრაინის აღმოსავლეთით და სამხრეთით მოქმედ უკანონო ფორმირებებს. "აბსოლუტურად ცხადია, რომ რუსეთმა დაარღვია უკრაინის სუვერენიტეტი და ტერიტორიული მთლიანობა გასულ თვეს ყირიმის ანექსიით, ახლა კი რუსეთი აგრძელებს სამხრეთ-აღმოსავლეთ უკრაინაში უკანონო ფორმირებების მხარდაჭერას", - განაცხადა ბარაქ ობამამ. ამასთან, აშშ-ის პრეზიდენტი დარწმუნებულია, რომ რუსეთი არ არის დაინტერესებული სამხედრო კონფლიქტში მიუხედავად რეგიონში არსებული დაძაბულობისა და იმისა, რომ გასულ კვირას რუსულმა სამხედრო თვითმფრინავმა შავი ზღვის დასავლეთით მყოფ ამერიკული ხომალდთან ახლოს მანევრირებმა მოახდინა. "რუსეთი არ არის დაინტერესებული ჩვენთან სამხედრო კონფრონტაციით. ჩვენ არ გვინდა ომი. ჩვენ გვჭირდება იმის აღიარება, რომ ისეთ ქვეყნებს, როგორიც უკრაინაა, შეუძლიათ მეზობლებთან ურთიერთობა და არც რუსეთი და არც აშშ, ან ვინმე სხვა უნდა იღებდეს მათ ნაცვლად გადაწყვეტილებებს", - აღნიშნა ბარაქ ობამამ.