მოსამართლის გადაწყვეტილება, რომლის მიხედვითაც ემზარ კვიციანს პატიმრობა 1 თვით გაუხანგრძლივდა, სააპელაციო სასამართლოში გასაჩივრდება. ამის შესახებ განცხადება წინასასამართლო სხდომის დასრულების შემდეგ ემზარ კვიციანის ადვოკატმა კობა კობახიძემ გააკეთა. როგორც კობახიძემ აღნიშნა, უკანონობაა, რომ დეპუტატების მიერ მთავარი პროკურორის სახელზე დაწერილ შუამდგომლობის წერილს, გიორგი ბადაშვილი არ გასცნობია. "ჩვენი შუამდგომლობა იყო 35 პარლამენტარის მიერ წარმოდგენილი წერილი, რომლებიც შუამდგომლობდნენ თავდებზე, რაც მოსამართლემ არ დააკმაყოფილა. მაგრამ მთავარი აქ იყო ის, რომ წერილი მთავარი პროკურორის, ბადაშვილის სახელზე იყო დაწერილი. ბადაშვილს ეს წერილი არც გასცნობია. ქვემდებარე პროკურორმა ბადაშვილის მაგივრად გასცა პასუხი, რომ იგი ისევ უჭერს მხარს ძველ შუამდგომლობას, ანუ პატიმრობის გაგრძელებას. ქვემდგომმა პროკურორმა ზემდგომის გარეშე გადაწყვიტა აღმკვეთი ღონისძიების გაგრძელების საკითხი. ეს არის დიდი უკანონობა და ჩვენ სააპელაციო სასამართლოში ამ გადაწყვეტილებას აუცილებლად გავასაჩივრებთ 48 საათის განმავლობაში", - განაცხადა კობა კობახიძემ. პროკურორ თენგიზ ხარებავას განცხადებით კი, მოსამართლემ გაითვალისწინა შუამდგომლობაში არსებული ფაქტობრივი გარემოებები და დააკმაყოფილა პროკურატურის შუამდგომლობა.რაც შეეხება იმ საკითხს, ბადაშვილი იცნობს თუ არა წერილს, რომლითაც დეპუტატებმა მთავარ პროკურორს მიმართეს, ხარებავამ აღნიშნა, რომ წერილი ადრესატამდე არ მისულა. "მე არ მავალდებულებს კანონმდებლობა, ჩემს მიერ შემოტანილი შუამდგომლობის საკითხები შემდგომ ისევ ვიღაცას შევუთანხმო", - განაცხადა თენგიზ ხარებავამ. დღეს, თბილისის საქალაქო სასამართლომ, ემზარ კვიციანს პატიმრობის ვადა ერთი თვით, 28 მაისამდე გაუგრძელა.