ყვარელში ხმაურია - რამდენიმე წუთის წინ გამგებელი დააკავეს. დავით ქევხიშვილი პოლიციის სამმართველოშია გადაყვანილი, სხვა დეტალები ამ დროისთვის არ ხმაურდება. გამგეობის შენობაში პოლიციის საგანგებო დანაყოფები შეიყვანეს. სამართალდამცველები საკრებულოს წევრებს იცავენ, რომელთაც დღეს აქციის მონაწილეები დაუპირისპირდნენ. უკვე მეორე დღეა გამგეობა პარალიზებულია. შენობა პიკეტირებული აქვთ გამგებლის მხარდამჭერებს. დღეს ინციდენტიც მოხდა, შეკრებილებმა საკრებულოს წევრებს კვერცხები ესროლეს. აქციის მონაწილეები საკრებულოს მოთხოვნას აპროტესტებენ, რომლის მიხედვითაც, ყვარლის გამგებელმა დავით ქევხიშვილმა თანამდებობა უნდა დატოვოს. ქევხიშვილი „ქართული ოცნების“ წევრია, მას ახლა ოპოზიციასთან ერთად მისივე თანაგუნდელებიც უპირისპირდებიან და მის გადადგომას კატეგორიულად ითხოვენ. საკრებულოს წევრები აცხადებენ, რომ ქევხიშვილი, რომელსაც ამავე დროს ბრალდება სამსახურებრივი უფლებამოსილების გადამეტების მუხლით აქვს წაყენებული, დაკისრებულ მოვალეობას ვერ ასრულებს. თავად გამგებელი კი სპეციალური კომისიის შექმნას და საქმის გამოძიებას ითხოვს. ამტკიცებს, რომ ბრალდებები უსაფუძვლოა. შს სამინისტროს კახეთის მთავარი სამმართველოს თანამშრომლებმა ყვარლის მუნიციპალიტეტის გამგებელი დავით ქევხიშვილი, ადმინისტრაციულ სამართალდარღვევათა კოდექსის 166–ე მუხლით, წვრილმანი ხულიგნობის ბრალდებით დააკავეს – ამის შესახებ რადიო "ჰერეთს" შს სამინისტროს პრესსამსახურის წარმომადგენელმა შორენა ჯახუამ განუცხადა. მისი თქმით, გამგებელთან ერთად დაკავებულია 17 ადამიანი. მათ ბრალად ედებათ პოლიციელთათვის დაუმორჩილებლობა და წვრილმანი ხულიგნობა. ამ დროისთვის დაკავებულები კახეთის მთავარი სამმართველოს ყვარლის რაიონულ განყოფილებაში იმყოფებიან. მათ დღესვე გურჯაანის სასამართლოში გადაიყვანენ, სადაც პროცესი გაიმართება. შს სამინისტროს პრესსამსახურში ამბობენ, რომ სავარაუდოდ დაკავებულებს ჯარიმის გადახდა დაეკისრებათ.