ანტიდისკრიმინაციული კანოპროექტი უნდა იყოს მიღებული -ამის შესახებ ჟურნალისტებს სახალხო დამცველმა,უჩა ნანუაშვილმა განუცხადა. მისი თქმით,ასევე მნიშვნელოვანია,რომ ის შენიშვნები იყოს გათვალისწინებული, რაც სახალხო დამცველის ოფისმა და არასამთავრობო ორგანიზაციებმა წარადგინეს. "ძირითადად ეს ეხება კერძო სექტორსა და ჩვენს უფლებებს კერძო სექტორთან მუშაობასთან მიმართებაში, რომ გაგვაჩნდეს გარკვეული მანდატი, რათა კერძო სექტორში მუშაობის შესაძლებლობა გვქონდეს, როდესაც საუბარია დისკრიმინაციის ფაქტებზე და ინფორმაციის გამოთხოვაზე. ასევე საუბარია სასამართლოს გამოყენებაზე დაჯარიმების პროცესში, ეს არის ორი უმნიშვნელოვანესი საკითხი სხვა საკითხებთან ერთად, რომლებიც აუცილებლად უნდა იყოს განხილული. ერთ-ერთი საკითხი ასევე არის რა თქმა უნდა, დაფინანსების საკითხი, რომლის გარეშეც შეუძლებელია რეალურად რამე მექანიზმის შექმნა, რომ დისკრიმინაციის ფაქტები რეალურად გამოვლინდეს", - განაცხადა უჩა ნანუაშვილმა. რაც შეეხება სასულიერო პირების მოთხოვნას კანონპროექტიდან 4 სიტყვის ამოღებასთან დაკავშირებით, როგორც სახალხო დამცველი მიიჩნევს, ეს სიტყვები კანონპროექტში უნდა დარჩეს. "მე ვფიქრობ, რომ დისკრიმინაციის ყველა საფუძველი უნდა დარჩეს ისე, როგორც ამჟამად არის კანონპროექტში. კანონპროექტში ნებისმიერი დისკრიმინაციის საფუძვლის ამოღება კიდევ უფრო უკან გადადგმული ნაბიჯი იქნება ნებისმიერ შემთხვევაში, ამიტომ ის ფორმა, რაც არის მიღებული აუცილებლად უნდა დარჩეს", - განაცხადა უჩა ნანუაშვილმა."დისკრიმინაციის ყველა ფორმის აღმოფხვრის შესახებ" კანონის პროექტის მიხედვით, იკრძალება ნებისმიერი ნიშნით დისკრიმინაცია, მათ შორის ისეთი ნიშნებით, როგორიცაა: ასაკი, ჯანმრთელობის მდგომარეობა, შეზღუდული შესაძლებლობა, სექსუალური ორიენტაცია, გენდერული იდენტობა, პროფესია. კანონპროექტი კრძალავს დისკრიმინაციას როგორ საჯარო, ასევე კერძო სფეროში. დისკრიმინაციის აღმოფხვრისა და თანასწორობის უზრუნველყოფის საკითხებზე ზედამხედველობას სახალხო დამცველი განახორციელებს. პროექტის მიხედვით, სახალხო დამცველი დისკრიმინაციის წინააღმდეგ ბრძოლის, პრევენციის და თანასწორობის შესახებ სპეციალურ ანგარიშს მოამზადებს. საკანონმდებლო პაკეტის განხილვა გუშინ ადამიანის უფლებათა დაცვის სხდომაზე 5-საათზე მეტი ხნის განმავლობაში მიმდინარეობდა. სხდომაში მონაწილე სასულიერო პირებისა და მათთან ერთად არასაპარლამენტო ოპოზიციის მთავარი მოთხოვნა "სექსუალური ორიენტაციის" და "გენდერული იდენტობის" პუნქტების ამოღება იყო. მათი შეფასებით, კანონში აღნიშნული ტერმინების დაფიქსირება "ცოდვისა და უზნეობის დაკანონებას ნიშნავს".