საქართველოში დიდი ბრიტანეთის საგარეო საქმეთა მინისტრის უილიამ ჰეიგის მოსალოდნელი ვიზიტი სოხუმის შეშფოთებას იწვევს. ამის შესახებ სოხუმის დეფაქტო საგარეო უწყება აცხადებს. "ვიზიტისას საუბარი შეეხება საქართველოს ევროკავშირსა და ნატოში გაწევრიანებას, ასევე, სოხუმსა და ცხინვალში არსებული ვითარება განიხილება. საქართველოსა და დიდი ბრიტანეთის მოსალაპარაკებელი საკითხები შეუძლებელია, არ იწვევდეს ჩვენს შეშფოთებას, რადგან პირდაპირ ეხება აფხაზეთის ეროვნულ ინტერესებს – პირველ რიგში კი უსაფრთხოების სფეროში. არსებობს ყოველგვარი საფუძველი ვივარაუდოთ, რომ დასავლეთმა სერიოზულად გადაწყვიტა შური იძიოს რუსეთსა და მის მოკავშირეებზე. არ არის გამორიცხული, აფხაზეთზეც მოხდეს დასავლეთის ქვეყნების მხრიდან ზეწოლა, რაც სრულიად აწყობს საქართველოში რევანშისტულ ძალებს, რომლებიც კვლავ იმედოვნებენ სოხუმის დაბრუნებას. ასევე, ნატოს მთავარსარდლის განცხადების შემდეგ, რომელიც არ გამორიცხავს ალიანსის ჯარების მუდმივ განლაგებას აღმოსავლეთ ევროპის ზოგიერთ ქვეყანაში,არ არის გამორიცხული, რომ თბილისში ზოგიერთებმა ისარგებლონ ამ ვითარებით და მიაღწიონ საქართველოს ტერიტორიაზე ნატოს ჯარების განთავსებას. ამას რეგიონული უსაფრთხოებისთვის უკიდურესად ნეგატიური შედეგი ექნება. ამ ვითარებაში, აფხაზეთისთვის ბუნებრივი ნაბიჯი იქნება რუსეთთან თავდაცვის სფეროში ურთიერთობის გაზრდა და ჩვენი შეიარაღებისა და უსაფრთხოების ორგანოების კოორდინაციის გაზრდა ქართულ-აფხაზური საზღვრის ზონაში,რათა ზოგიერთებს არ გაუჩნდეს სურვილი რესპუბლიკაში დესტაბილიზაცია გამოიწვიოს", – ნათქვამია დეფაქტო საგარეო უწყების განცხადებაში.