რუსეთ-უკრაინის საზღვრის გადაკეტვის ოპერაცია დასრულებულა, განაცხადა უმაღლესი რადას თავმჯდომარემ, ალექსანდრე ტურჩინოვმა. უნიანის ინფორმაციით, განცხადება ამის შესახებ სპიკერმა პარლამენტის სხდომაზე გააკეთა.  მანამდე გავრცელდა ინფორმაცია, რომ გასულ ღამეს ტერორისტებმა არტიომოვსკის სამხედრო ნაწილს შეუტიეს. უკრაინელმა სამხედროებმა შტურმი მოიგერიეს. დაჭრილია ერთი სამხედრო მოსამსახურე, ბოევიკებს დანაკარგის შესახებ განცხადება არ გაუკეთებიათ. ამასთან, დონეცკის თვითაღიარებული რესპუბლიკის ვიცე-პრემიერი ანდრეი პურგინი ეჭვობს, რომ რუსეთ-უკრაინის საზღვრის გადაკეტვის შესახებ გავრცელებული ინფორმაცია სიმართლეს არ შეესაბამება. თავის მხრივ, "დონბასის ამბოხებულების" წარმომადგენელმა, მიროსლავ რუდენკომ განაცხადა: "თუ წარმოვიდგენთ, რომ საზღვარი სრულიად გადაიკეტა, მაშინ, ქალაქებში, სადაც საომარი მოქმედებები მიმდინარეობს, ჰუმანიტარული კატასტროფა დაიწყება“. "რუსეთის ჰუმანიტარული დახმარებისა და რუსი მოხალისეების გარეშე ჩვენი დატოვება , რუსების ნამდვილ გენოციდს ნიშნავს", - განაცხადა მ.რუდენკომ .