თავდაცვისა და უსაფრთხოების საპარლამენტო კომიტეტის თავმჯდომარის, ირაკლი სესიაშვილის აზრით, ოპოზიციონერ დეპუტატებთან დაკავშირებით ბაქოს აეროპორტში მომხდარ ინციდენტზე სერიოზული გამოძიების ჩატარებაა საჭირო. როგორც სესიაშვილმა გადაცემა "რეაქციაში" განაცხადა, ალოგიკურია შემთხვევის შესახებ ის სცენარი, რასაც ზურაბ ჯაფარიძე ყვება. "მიუხედავად იმისა, რომ პატივს ვცემ უდანაშაულობის პრეზუმპციას, ამ ფაქტთან დაკავშირებით საჭიროა სერიოზული გამოძიების ჩატარება, რადგან რა სცენარსაც გვთავაზობს ბატონი ზურაბი, აბსოლუტურად არალოგიკურია, მათ შორის კითხვებს იწვევს მისი განცხადება, რომ აზერბაიჯანში ის და ირმა ნადირაშვილი იმყოფებოდნენ მარნეულის და გარდაბნის ინციდენტზე სასაუბროდ. ამ შემთხვევაში ჩნდება ლოგიკური კითხვა - რატომ გასწიეს მათ ხარჯი, როცა ბაქოში იყო ორი დეპუტატი მაჭავარიანისა და ბარამიძის სახით", - განაცხადა სესიაშვილმა და იქვე განმარტა, რომ შეკითხვებს იწვევს ის ფაქტიც, რომ ჯაფარიძე და ნადირაშვილი ყველანაირად ცდილობდნენ აეროპორტში განვითარებული მოვლენების გახმაურება არ მომხდარიყო. ამასთან, საპარლამენტო უმცირესობის წარმომადგენლის შეფასებით, ჯაფარიძე და ნადირაშვილი ცდილობენ აღნიშნული შემთხვევა "ნაციონალური მოძრაობისთვის" დამახასიათებელი სტრატეგიით შეფუთონ. "რადგან გაიშიფრნენ, ყველაფრის ხელისუფლებისთვის გადაბრალებას აპირებენ", - აღნიშნა სესიაშვილმა.