საქართველოს პრემიერ-მინისტრმა პრეზიდენტს მთავრობის ახალი შემადგენლობა უკვე წარუდგინა. როგორც მთავრობის საპარლამენტო მდივანმა შალვა თადუმაძემ განაცხადა,მინისტრობის კანდიდატების სია პრეზიდენტის ადმინისტრაციაში ცოტა ხნის წინ გაიგზავნა. კონსტიტუციის მიხედვით, მინისტრთა კაბინეტის განახლებულ შემადგენლობას პარლამენტმა ნდობა თავიდან უნდა გამოუცხადოს, აღნიშნულისთვის კი საკანონმდებლო ორგანოს პრეზიდენტმა უნდა მიმართოს. კანონმდებლობით, ქვეყნის პირველ პირს ნდობის მოსაპოვებლად საკანონმდებლო ორგანოსადმი მიმართვისთვის 7 დღიანი ვადა აქვს, თუმცა არსებული ინფორმაციით, მთავრობის ახალ შემადგენლობას პრეზიდენტი ხელს დღესვე მოაწერს. პრეზიდენტის წარდგინება საკანონმდებლო ორგანოში, სავარაუდოდ, ხვალ მოხდება. თავის მხრივ, პარლამენტი ვალდებულია აღნიშნული საკითხი, 7 დღის ვადაში განიხილოს, თუმცა, მოსალოდნელია, რომ პროცედურა ამ შემთხვევაშიც დაჩქარდება. საქართველოს პრემიერ-მინისტრმა ირაკლი ღარიბაშვილმა მინისტრთა კაბინეტის წევრობის ახალი კანდიდატები გუშინ დაასახელა. პრემიერ-მინისტრის გადაწყვეტილებით, სოფლის მეურნეობის მინისტრის თანამდებობაზე წარდგენილია ოთარ დანელია, სასჯელაღსრულების მინისტრის პოსტზე გიორგი მღებრიშვილი, კულტურის მინისტრად მიხეილ გიორგაძე, ინფრასტრუქტურის მინისტრად დავით შავლიაშვილი, დიასპორის საკითხებში სახელმწიფო მინისტრად გელა დუმბაძე. რაც შეეხება ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების სამინისტროს, მას სოზარ სუბარი უხელმძღვანელებს, რომელიც სასჯელაღსრულების სამინისტროდან სწორედ აღნიშნულ უწყებაში გადაინაცვლებს. ასევე მთავრობაში რჩება რეგიონული განვითარებისა და ინფრასტრუქტურის მინისტრის თანამდებობიდან გათავისუფლებული ელგუჯა ხოკრიშვილი, რომელიც ამ უწყებიდან მუშაობას გარემოს დაცვის სამინისტროში გააგრძელებს. პრემიერ-მინისტრმა ირაკლი ღარიბაშვილმა მთავრობაში 7 საკადრო ცვლილების შესახებ განცხადება 21 ივლისს, საგანგებო პრესკონფერენციაზე გააკეთა.