ჯერ უცნობია, როდის მიმართავს მთავარი პროკურატურა მიხეილ სააკაშვილისთვის აღკვეთის ღონისძიების გამოყენების შუამდგომლობით სასამართლოს. როგორც "ინტერპრესნიუსს" მთავარი პროკურატურის პრესსამსახურში განუცხადეს, ამ საკითხზე პასუხი მათ მოგვიანებით ექნებათ. აღნიშნული საკითხი ასევე უცნობია მიხეილ სააკაშვილის ადვოკატ ოთარ კახიძისთვის. მისი თქმით, ვინაიდან პირი დაკავებული არ არის, პროკურატურა ვადებში შეზღუდული არ არის. საქართველოს ყოფილ პრეზიდენტს დაუსწრებლად ბრალი გუშინ წაუყენეს. მთავარ პროკურატურაში მის ადვოკატ ოთარ კახიძეს ბრალის დადგენილება უკვე გადაეცა. საქართველოს ყოფილი პრეზიდენტი მიხეილ სააკაშვილი ბრალდებულის სახით სისხლის სამართლის პასუხისგებაში მიეცა. აღნიშნულთან დაკავშირებით განცხადება მთავარ პროკურატურაში ორი დღის წინ გაკეთდა. უწყების ინფორმაციით, საქმე ეხება 2007 წლის 7 ნოემბერს მომიტინგეთა მასობრივად დარბევას, ტელეკომპანია "იმედში" შეჭრას და არკადი (ბადრი) პატარკაციშვილის ქონების დანაშაულებრივად ხელში ჩაგდებას. ყოფილ პრეზიდენტს 5-დან 8 წლამდე პატიმრობა ემუქრება. მიხეილ სააკაშვილთან ერთად, ბრალდების შესახებ დადგენილებები გამოტანილია შინაგან საქმეთა ყოფილი მინისტრის, ვანო მერაბიშვილის, ყოფილი გენერალური პროკურორის ზურაბ ადეიშვილის, თავდაცვის ყოფილი მინისტრის დავით კეზერაშვილისა და თბილისის ყოფილი მერის გიგი უგულავას მიმართ. გიგი უგულავასა და ვანო მერაბიშვილს ბრალი ე.წ. მატროსოვის ციხეში უკვე წარედგინათ.