საქართველოს პრემიერ-მინისტრი ირაკლი ღარიბაშვილი პარტნიორ ქვეყნებს სთავაზობს, მათი დაინტერსების შემთხვევაში ძალიან სერიოზული საქმეების გამოძიების პროცესში ჩაერთონ, - ამის შესახებ ირაკლი ღარიბაშვილმა მთავრობის დღევანდელ სხდომაზე განაცხადა, სადაც გაერო-ს ადამიანის უფლებათა კომიტეტის ანგარიშს გამოეხმაურა. "ეს არის წინასწარი დასკვნა, "დრაფტი", მაგრამ არის საკმაოდ დამაფიქრებელი, ძალიან სერიოზული დასკვნა რომელიც შეეხება ადამიანის უფლებების წარსულში ჩადენილ დარღვევის ფატქების გამოძიებას. გაერო-ს პირდაპირი რეკომენდაცია და მოწოდებაა, რომ მაქსიმალურად დაჩქარდეს წარსულში წინა ხელისუფლების დროს ჩადენილი მძიმე დანაშაულების გამოძიების პროცესი. ასევე, გაერო-ს კომიტეტი შეშფოთებას გამოთქვამს იმის გამო, რომ ეს პროცესი ნელა მიმდინარეობს და იქ საუბარია ისეთ მძიმე დანაშაულზე როგორიცაა წამება, ქონების დატაცება და მრავალი სხვა ადამიანის უფლებების უხეში დარღვევის ფაქტები. ეს არის მართლაც ჩვენთვის დასაფიქრებელი, ჩვენი მთავრობისთვის. ჩვენ ყველაფერს ვაკეთებთ მაქსიმალურად გამჭვირვალედ. პროცესები არის ღია. მოვუწოდებ ჩვენი ქვეყნის პარტნიორ და მეგობარი ქვეყნების წარმომადგენლებს, რომ, მათი დაინტერსების შემთხვევაში, ჩაერთონ ამ პროცესში, მით უმეტეს ძალიან სერიზოული საქმეების გამოძიებაზე გვაქვს საუბარი", - განაცხადა ირაკლი ღარიბაშვილმა და დასძინა, რომ მთავრობა მაქსიმალურად უზრუნველყოფს აღნიშნული პროცესების გამჭვირვალობას.