გაეროს 67-ე გენერალურ ასამბლეაზე სიტყვით გამოსვლისას საქართველოს პრეზიდენტმა მიხეილ სააკაშვილმა საქართველოს პენიტენციურ სისტემაში განვითარებულ მოვლენებზე ისაუბრა. „პირველივე შემთხვევა, რაზეც ჩვენ რეაგირება მოვახდინეთ არის ის, რომ გავათავისუფლეთ ორი მინისტრი. ეს ცუდი მაგალითი იყო იმ ქვეყნებისათვის, რომელთაც საქართველოს კარგად ყოფნა არ უნდათ და ნიშანი იმისა, რომ მსოფლიოს ეს ნაწილი სწორი მიმართულებით განვითარდება „–განაცხადა საქართველოს პრეზიდენტმა. ქვეყნის პირველი პირის თქმით, თავისუფალ საზოგადოებას ყოველთვის აქვს პრობლემები, რადგან მთავრობის მოვალეობაა იყოს გახსნილი. "მონტესკიე წერდა - ქვეყანაში თუ ყველა მთავრობას და ერთმანეთს ეთანხმება, ეს ქვეყანა აღარ არის, ის არის უკვე სასაფლაო. პირადი გამოცდილებით ვამბობ, რომ ჩემი ქვეყანა დემოკრატიის გამოცდის წინაშე აღმოჩნდა, როდესაც ციხეში სასტიკი მოპყრობის კადრები გამოჩნდა. ჩვენი პასუხისმგებლობა ნათელი იყო და ჩვენი რეაქცია იყო სწრაფი. გავაკეთეთ ის, რაც დემოკრატიულ ქვეყანას უნდა გაეკეთებინა - დავადგინეთ პასუხისმგებელი პირები და დავაპატიმრეთ ისინი. ორი მინისტრი გადადგა და ხელმძღვანელის თანამდებობაზე დავნიშნეთ საპატიმროებისა და პენიტენციური სისტემის ერთ-ერთი ყველაზე გამოკვეთილი კრიტიკოსი. ასე მუშაობს და ვითარდება დემოკრატია. ის გამოწვევები, რომელიც ქვეყანაში არსებობს, ჩემს მთავრობას უფრო მეტ პასუხისმგებლობას აკისრებს. არ არსებობს სისტემა ხარვეზების გარეშე. თავისუფალი საზოგადოების აშენება და შენარჩუნება არის ძალიან სერიოზული რისკის ქვეშ მყოფი მოვლენა. ეს რისკი ნამდვილად შესაბამისია და ის უნდა გავწიოთ", - განაცხადა პრეზიდენტმა. მისივე თქმით, დღეს ბევრი ადამიანი გამოთქვამს ეჭვს, რომ გათავისუფლების სიხარულის კადრები დამსხვრეული ოცნებებით შეიცვალა და თურმე მსოფლიო უკეთესი იყო, როცა ნაკლები ადამიანი იყო თავისუფალი. "მე მოვედი, რომ საპირისპირო რამ მოგახსენოთ და თავისუფალ საზოგადოებას მივმართო", - აღნიშნა პრეზიდენტმა.