მთავარ პროკურატურასა და ოლეგ მელნიკოვს შორის საპროცესო შეთანხმების დეტალები გახდა ცნობილი. როგორც ჟურნალისტებს პროკურორმა ირაკლი ნადარეიშვილმა განუცხადა , მას შემდეგ, რაც პროკურატურასა და მელნიკოვს შორის გაფორმებულ საპროცესო შეთანხმებას სასამართლო დაამტკიცებს, ოლეგ მელნიკოვს ორი წლით თავისუფლების აღკვეთა, ორი წლით პირობითი მსჯავრი, ორი წლით გამოსასწორებელი ვადა და ერთი წლით საჯარო სამსახურში საქმიანობის ჩამორთმევის უფლება განესაზღვრება. "ოლეგ მელნიკოვმა აღიარა დანაშაული, ითანამშრომლა გამოძიებასთან, ამხილა თანამონაწილე და ორგანიზატორი პირები. ამდენად, მოქმედი კანონმდებლობიდან გამომდინარე, მასთან მთავარმა პროკურატურამ საპროცესო შეთანხმება გააფორმა. თუ სასამართლოს მხრიდან საპროცესო შეთანხმება დამტკიცდა, ოლეგ მელნიკოვს განესაზღვრება რეალური სასჯელი 2 წლით თავისუფლების აღკვეთა, 2 წლით პირობითი მსჯავრი, 2 წლით გამოსაცდელი ვადა და ერთი წლით საჯარო საქმიანობის ჩამორთმევის უფლება. აღნიშნული პირობა წარდგენილია სასამართლოზე და საპროცესო შეთანხმება მოსამართლის მხრიდან ჯერ კიდევ დამტკიცებას მოითხოვს. ამის შესახებ მხოლოდ მაშინ იქნება საუბარი საბოლოოდ შესაძლებელი", - აღნიშნა ნადარეიშვილმა. "ინტერპოლით" ძებნილი ოლეგ მელნიკოვი კიევში 2012 წლის 7 დეკემბერს დააკავეს. საქართველოში მისი ექსტრადიცია 2013 წლის 30 სექტემბერს განხორციელდა. ორწლიანი პატიმრობა, რომელიც მელნიკოვს საპროცესო გარიგების შემთხვევაში შეეფარდება, სწორედ 2014 წლის დეკემბერში იწურება.