საინფორმაციო სააგენტო „ინტერპრესნიუსის“ განცხადებით "ქართული ოცნების" ლიდერი ბიძინა ივანიშვილი კონსტიტუციით მინიჭებული უფლების გამოყენებასა და ხვალინდელ არჩევნებში ხმის მიცემაზე უარს ამბობს. ამის შესახებ "ინტერპრესნიუსს" კოალიციის პრესსპიკერმა მაია ფანჯიკიძემ განუცხადა და აღნიშნა, რომ ივანიშვილი საარჩევნო უბანზე მხოლოდ მეუღლეს გაჰყვება. "ჩვენი პოზიცია არ შეცვლილა. ბიძინა ივანიშვილი არ აპირებს საკონსტიტუციო ცვლილებებით სარგებლობას და არჩევნებში ხმის მიცემის უფლების გამოყენებას, მაგრამ ის თავის მეუღლეს წაჯყვება ხმის მისაცემად, რომელიც სოლოლაკის ოლქშია რეგისტრირებული", - განმარტა ფანჯიკიძემ. საქართველოს კონსტიტუციის 104-წ მუხლის მე-4 პრიმა პუნქტში 2012 წლის 22 მაისს შესული ცვლილებების მიხედვით, "2014 წლის 1-ელ იანვრამდე საპარლამენტო და საპრეზიდენტო არჩევნებში მონაწილეობის და ხმის მიცემის უფლება საქართველოს მოქალაქეებთან ერთად შესაბამისი ასაკიდან აქვთ პირებს, რომლებიც დაბადებულნი არიან და ბოლო 5 წლის განმავლობაში მუდმივად ცხოვრობენ საქართველოში და ამ მუხლის ამოქმედების მომენტისთვის აქვთ ევროკავშირის მოქალაქეობა". "ქართული ოცნების" ლიდერ ბიძინა ივანიშვილს საქართველოს მოქალაქეობა პოლიტიკაში მოსვლის თაობაზე ოფიციალური განცხადების გაკეთებიდან რამდენიმე დღეში ჩამოართვეს. საქართველოს იუსტიციის სამინისტრო აღნიშნულს ივანიშვილის მიერ საფრანგეთის მოქალაქეობის მიღებით ხსნის და განმარტავს, რომ "საქართველოს კონსტიტუციის და "საქართველოს მოქალაქეობის შესახებ" საქართველოს ორგანული კანონის 32-ე მუხლის მიხედვით, საქართველოს მოქალაქის მიერ სხვა სახელმწიფოს მოქალაქეობის მიღება იწვევს საქართველოს მოქალაქეობის დაკარგვას". თავად ბიძინა ივანიშვილი კი აღნიშნულს პოლიტიკური მოტივით ხსნის და მისთვის მოქალაქეობის ჩამორთმევას უკანონოდ მიიჩნევს. სწორედ ამ მიზეზით კოალიციის ლიდერმა საკონსტიტუციო ცვლილებებთან დაკავშირებით თავისი უარყოფითი პოზიცია თავიდანვე დააფიქსირა.