კოალიცია "ქართული ოცნების" ლიდერმა ბიძინა ივანიშვილმა კოალიციის ოფისში გამართულ პრეკონფერენციაზე რამდენიმე საკითხზე გაამახვილა ყურადღება. "საშინელებები ხდება ციხეებში და ჩვენ ეს კადრები ვნახეთ", - განაცხადა მან. "მინდა ვთხოვო დღევანდელ ხელისუფლებას - რადგან ჩვენ ჯერ არა გვაქვს არავითარი კანონიერი უფლება - დღეიდანვე, ყველაზე გვიან ხვალიდანვე, ციხის ყველა მოსამსახურე, ვინც ამ ძალადობებში მონაწილეობდა, სასწრაფოდ გამოიყვანონ ციხეებიდან, პირველივე პატრულით ჩაანაცვლონ." ივანიშვილის განცხადებით, ესენი არ არიან ჯანმრთელი ხალხი, ესენი არიან ავადმყოფები. "თუ შესაძლებელია, ჩაანაცვლონ დღესვე - არაფერი მოხდება, არავინ აბუნტდება, არაფერი დაინგრევა, არაფერი გაფუჭდება. საშინელ დღეში არიან დღეს პატიმრები. იქნებ როგორმე სასწრაფოდ მათ მიეცეთ საშველი", - განაცხადა ივანისვილმა. ივანიშვილა ასევე ისაუბრა მინისტრებისა და მათი მოადგილეების მომავალზე და აღნიშნა რომ ვერც ერთი მინისტრი ვერ შეინარჩუნებს თანამდებობას, მისი თქმით, მინისტრის მოადგილეების საკითხიც გასარკვევია. "ვერც ერთ მინისტრი ვერ გახდება ჩვენი გუნდი წევრი, მათ შორის - მერაბიშვილი", - განაცხადა ივანიშვილმა. “ქართული ოცნების” ლიდერი რუსეთთან ურთიერთობის დარეგულირების პერსპექტივებსაც შეეხო. იგი საქართველოს ნატო-ში ინტეგრაციის პარალელურად, რუსეთთან ურთიერთობის დალაგების გზას სწორ დიპლომატიაში ხედავს. "ქართული ოცნების" ლიდერის განცხადებით, საქართველოს სტრატეგია არ იცვლება და კვლავ რჩება იმ გზაზე, რომელიც ქართველი ხალხის არჩევანი და პირადად მისი დამოკიდებულებაა. ივანიშვილის თქმით, მომავალი მთავრობის სწრაფვა იქნება ევროპა და უსაფრთხოების თვალსაზრისით ნატო, თუმცა ამის მიუხედავად, არსებობს დიდი სურვილი და ვალდებულება, რომ საქართველომ თავის ყველაზე დიდ მეზობელთან რუსეთთან ურთიერთობები დაალაგოს. "გვესმის წინააღმდეგობები და მე კარგად ვაცნობიერებ, რომ ეს არ იქნება ადვილი, თუმცა არც შეუძლებელია. ვფიქრობ, რომ რუსეთის პოზიცია საქართველოს ნატო-სკენ სწრაფვასთან დაკავშირებით ძალიან გააღიზიანა და გააღრმავა სააკაშვილმა. მესმის, რომ გეოპოლიტიკურად ეს რუსეთისთვის არ არის საინტერესო, მაგრამ არ ვთვლი, რომ არის პრინციპული საკითხი. სწორი დიპლომატიით და ანალიზით, სწორი დროით შეიძლება რუსეთის დარწმუნება, რომ ეს არ იქნება მისთვის საფრთხე",- აღნიშნა ბიძინა ივანიშვილმა. "ქართული ოცნების" ლიდერმა ამ მიმართულებით მაგალითად ბალტიისპირეთის ქვეყნები დაასახელა. მისი თქმით, ერთ დროს რუსეთისთვის პრინციპული საკითხი იყო ბალტიისპირეთის ქვეყნები ნატო-ში არ შესულიყვნენ, თუმცა მათ ეს მოახერხეს და რუსეთთანაც დაალაგეს ურთიერთობა და საქართველოც ყველაფერს გააკეთებს იმისთვის, რომ ეს მოახერხოს.