დღეს, გამთენიისას, თბილისში, გაგარინის მოედანზე მდენარე ლომბარდი დააყაჩაღეს. წაღებულის ოქროს ნაკეთობი და ფული. გატაცებული თანხისა და ოქროულის საერთო ღირებულება ჯერჯერობით დაუდგენელია. საინფორმაციო საგენტო „ინტერპრესნიუსის“ ცნობით სამართალდამცავები გაგარინის #10-ში მდებარე ლომბარდის დაყაჩაღებაში ეჭვმიტანილ ორ პირს ეძებს. როგორც "ინტერპრესნიუსთან" საუბრისას ლომბარდის ოპერატორმა დიანა ქარელიძემ განაცხადა, ლომბარდის დაყაჩაღება გამთენისას, 04:00 საათზე მოხდა. ქარელიძის განცხადებით ლომბარდში ორი პიროვნება შევიდა და მოლარე ოპერატორის ლომბარდში ლეპტოპის ჩაბარება სთხოვა. მომხდარზე აღძრულია სისხლის სამართლის საქმე. მიმდინარეობს გამოძიება. "ვინაიდან ჩვენ ლომბარდს დიდი სარკმელი არ აქვს, ამიტომ მოლარე ოპერატორმა მათ სთხოვა ქვედა მაგიდაზე დაედოთ ლეპტოპი, თვითონ გარეთ გასულიყვნენ, რათა ოპერატორი გამოსულიყო ოთახიდან და შეემოწმებინა და შეეფასებინა ლეპტოპი. თუმცა როგორც კი გამოვიდა ოპერატორი ოთახიდან, ორმა პირმა წიხლით შეანგრია კარი და ოპერატორს ყელზე ცივი იარაღი დაადო და სეიფის გახსნა მოსთხოვა. ამის შემდეგ დამნაშავეებმა სეიფში არსებული ფული და ოქროულობა აიღეს და გაურკვეველი მისამართით გაიქცნენ", - განაცხადა დიანა ქარელიძემ. მისივე ინფორმაციით, ადგილზე მივიდა კრიმინალური პოლიცია, შეამოწმეს ლომბარდის ტერიტორია და აიღეს თითის ანაბეჭდები. მიმდინარეობს ზარალის დათვლა. ჯერჯერობით ეჭვიტანილები დაკავებულები არ არიან. ლომბარდი ამ დროისთვის ჩვეულ რეჟიმში მუშაობს.