ევროკავშირის ელჩმა საქართველოში ფილიპ დიმიტროვმა პრესკონფერენციაზე საქართველოში მედიის პოლარიზებაზე ისაუბრა. მან აღნიშნა რომ, მედიამონიტორინგის პროექტი, რომელიც 11 მაისიდსან 15 ოქტომბრამდე, ევროკავშირისა და გაერო-ს განვითარების პროგრამის მხარდაჭერით ხორციელდებოდა, წარმატებული იყო და მან მნიშვნელოვანი გავლენა მოახდინა მედიის მიერ საკუთარი მოვალეობის შესრულებაზე. ფილიპ დიმიტროვის განცხადებით პროექტის განხორციელების თხოვნით ევროკავშირის წარმომადგენლობას ოპოზიციისა და ხელისუფლების წარმომადგენლებმა ჯერ კიდევ 2011 წლის ნოემბერში მიმართეს. "ამ პროექტმა გავლენა მოახდინა მედიის მიერ საკუთარი მოვალეობების შესრულებაზე. დღეს მედია პოლარიზებულია. ეს მხოლოდ საქართველოს პრობლემა არ არის, თუმცა აქ ეს განსაკუთრებით თვალშისაცემია. ასევე, შესამჩნევია პოლიტიკური ვნებათაღელვაც, რაც ერთი თვალის დახამხამებაში ვერ შეიცვლება. ამ პროექტმა შესაძლოა, გავლენა მოახდინოს საპრეზიდენტო არჩევნებზეც, რადგან პროექტი 2013 წლის ბოლომდე გაგრძელდება. მედიამონიტორინგის პროცესში ჩვენი მიზანი იყო, ხელი შეგვეწყო მედიასაშუალებების პროფესიონალიზმის ამაღლებისთვის, მედიამფლობელების გამჭვირვალობისა და Must Carry-ის პრინციპის ხანგრძლივად დანერგვისთვის. საქართველოში მასმედიის მდგომარეობა შორს არის სრულყოფილებისგან, რეაგირებას მოითხოვს სარეკლამო ბაზარი, ასევე მედიასაშუალებების წარმომადგენლების პროფესიონალიზმი, თუმცა ეს ყველაფერი დამოკიდებულია იმაზე, რამდენად იარსებებს საქართველოში მოთხოვნა ამ ყველაფერზე. ჩვენ კი, ჩვენის მხრივ ვეცდებით, საქართველოში მედიაგარემო გაუმჯობესდეს", - აღნიშნა ფილიპ დიმიტროვმა.