ბაჩო ახალაიასა და მასთან ერთად ბრალდებულების მიმართ განაჩენი იმ ზეწოლის შედეგია, რაზეც დიდი ხანია ბაჩო ახალაიას ახლობლები საუბრობენ ,- ამის შესახებ ე.წ.ნავთლუღის სპეცოპერაციის საქმეზე ბაჩო ახალაიას მიმართ განაჩენის გამოცხადების შემდეგ მისმა ადვოკატმა მალხაზ ველიჯანაშვილმა განაცხადა. როგორც ადვოკატმა აღნიშნა, განაჩენის დასაბუთებული ნაწილის ჩაბარება საჭიროც კი არ არის. "შემიძლია გითხრათ, რომ ეს განაჩენი დაუსაბუთებელი იქნება,ვინაიდან საქმეში არანაირი მტკიცებულება არ არსებობს და აქედან გამომდინარე, ვერანაირად ვერ დაასაბუთებს სასამართლო. რაც შეეხება იმას, თუ რატომ იყო ასეთი გადაწყვეტილება მიღებული, ანი ნადარეიშვილმა გუშინ გაავრცელა ინფორმაცია, რომ მისთვის გამამტყუნებელი განაჩენი მოსალოდნელი იყო. ეს უკვე მერამდენე ფაქტია,როდესაც ანი ნადარეიშვილი წინასწარ აანონსებს მოსალოდნელ გადაწყვეტილებას მოსამართლის მხრიდან. ეს არის იმის შედეგი,რაზეც ამდენი ხანია ვსაუბრობთ",- განაცხადა მალხაზ ველიჯანაშვილმა. მისივე თქმით, ბაჩო ახალაიას განაჩენს სააპელაციო წესით გაასაჩივრებს. ე.წ.ნავთლუღის სპეცოპერაციის საქმეზე, ბაჩო ახალაია 333-ე მუხლით, რაც სამსახურებრივი უფლებამოსილების გადამეტებას ითვალისწინებს, გამართლდა. 332-ე მუხლის (სამსახურებრივი უფლებამოსილების ბოროტად გამოყენება) და 144-ე მუხლის(წამება) საფუძველზე კი, მას 7 წლითა და 6 თვით თავისუფლების აღკვეთა მიესაჯა. განაჩენის გამოცხადებას თავად ბაჩო ახალაია არ ესწრებოდა.