სასჯელაღსრულების დეპარტამენტის რუსთავის #16 დაწესებულებაში არსებულ მდგომარეობასთან დაკავშირებით  სახალხო დამცველის აპარატი განცხადებას ავრცელებს. განცხადებაში ნათქვამია, რომ  2012 წლის 31  ოქტომბერს, სახალხო დამცველის რწმუნებულები სასჯელაღსრულების #16 დაწესებულებაში იმყოფებოდნენ, სადაც მსჯავრდებულთა დიდ ნაწილს შეხვდნენ და გაესაუბრნენ. მსჯავრდებულებმა სახალხო დამცველის რწმუნებულებს კოლექტიური განცხადებები მიაწოდეს, რომელსაც  ხელს რამდენიმე ასეული პატიმარი აწერს. რადიო „ათინათი“ სახალხო დამცველის განცხადებას გთავაზობთ. „მსჯავრდებულთა გადმოცემით, 2012 წლის 29 ოქტომბერს დაწესებულებაში შეიცვალა დირექტორი, რომელმაც მოსვლის დღიდან დაიწყო ძველი მეთოდების დამკვიდრება - პატიმრებს დაუწესდათ გაუმართლებელი შეზღუდვები, კერძოდ, აღარ აძლევენ ეკლესიაში გადასვლის საშუალებას, საკანში სარეცხის გაფენის უფლებას, მიუხედავად იმისა, რომ ამისთვის სპეციალურად გამოყოფილი ადგილი არ არსებობს. მსჯავრდებულთა განცხადებით, ახალი დირექტორი პატიმრებს ემუქრება სასჯელის დამატებით, სპეცდანიშნულების რაზმის შემოყვანით. მათი თქმით, პატიმრებს უმიზეზოდ სჯიან და გადაყავთ სამარტოო საკანში. მსჯავრდებულების განცხადებაში ასევე აღნიშნულია, რომ #16 დაწესებულებაში განთავსებულნი არიან პატიმრები, რომლებისთვისაც ახალ დირექტორს, ლევან აბურჯანიას, პოლიციაში მუშაობის დროს, „ჩადებული“ აქვს ნარკოტიკი და რომლებიც ნაცემი ჰყავს. 31 ოქტომბერს ვრცელდებოდა ინფორმაცია ნაცემი პატიმრების თაობაზე, თუმცა სახალხო დამცველის რწმუნებულებისთვის პატიმრებს აღნიშნულის თაობაზე არანაირი ინფორმაცია არ მიუწოდებიათ. მსჯავრდებულთა თქმით, ისინი პროტესტის ნიშნად არ ისარგებლებენ პაემნებით. ისინი ხაზგასმით აღნიშნავენ, რომ პატიმრებს შორის არანაირი სახის უთანხმოება არ არსებობს, ხოლო ინფორმაცია, თითქოს #16 დაწესებულების მსჯავრდებულები ერთმანეთთან არიან დაპირისპირებულები, მცდარია. მონიტორინგის დროს #16 დაწესებულებაში შიმშილობდა 5 პატიმარი, ორი პატიმარი აპროტესტებდა სამარტოო საკანში განთავსებას, ხოლო სამი მათი თანასაკნელების სამარტოო საკანში გადაყვანას. სახალხო დამცველის პრევენციის ეროვნული მექანიზმი მოუწოდებს სასჯელაღსრულების, პრობაციისა და იურიდიული დახმარების საკითხთა მინისტრს, სიღრმისეულად შეისწავლოს ზემოაღნიშნული ფაქტები და მიიღოს კანონშესაბამისი გადაწყვეტილება. ზემოაღნიშნული განცხადებები რეაგირებისთვის გადაეგზავნა საქართველოს მთავარ პროკურატურას.“-ნათქვამია განცხადებაში.