პარლამენტში ინიცირებულ ”ამნისტიის შესახებ” კანონპროექტს დღეს, პირველი მოსმენით იურიდიულ საკითხთა და ადამიანის უფლებათა დაცვის კომიტეტები განიხილავს. კომიტეტების გაერთიანებული სხდომა უმაღლეს საკანონმდებლო ორგანოში 12:00 საათისთვის დაინიშნა. ~ამნისტიის შესახებ~ კანონპროექტის ინიცირება, რომლის საფუძველზეც სისხლისსამართლებრივი პასუხისმგებლობისა და სასჯელის მოხდისგან ~სისხლის სამართლის კოდექსით~ გათვალისწინებულ დანაშაულებში ბრალდებული და მსჯავრდებული პირების ნაწილი გათავისუფლდება, პარლამენტში 12 ნოემბერს მოხდა. წარმოდგენილი კანონპროექტის თანახმად, სასჯელისგან თავისუფლდებიან პირობით მსჯავრდებული პირები სასჯელის ვადისა და დანაშაულის სიმძიმის მიუხედავად. სასჯელისაგან თავისუფლდებიან ნაკლებად მძიმე დანაშაულის ჩადენისათვის თავისუფლების აღკვეთაშეფარდებული მსჯავრდებულები. ამ მიმართულებით ამნისტია ~სისხლის სამართლის კოდექსის~ მხოლოდ 15-მდე მუხლით მსჯავრდებულ პირს არ შეეხება. ასევე, პროექტის მიხედვით, სასჯელისგან თავისუფლდებიან მიმდინარე წლის 6 ნოემბრამდე გაუფრთხილებელი დანაშაულისათვის მსჯავრდებული პირები, ხოლო ამავე პერიოდამდე ჩადენილ ნაკლებად მძიმე დანაშაულთა, აგრეთვე გაუფრთხილებლობით ჩადენილ დანაშაულთა გამო აღძრული საქმეები ყველა საგამოძიებო ორგანოში შეწყდება. მათ არც სასამართლოები განიხილავენ. გაუნახევრდებათ სასჯელი არასრულწლოვნებს, ქალებს და პირველად ნასამართლევ პირებს, რომლებიც ბრალდებულნი ან მსჯავრდებულნი არიან მძიმე და განსაკუთრებით მძიმე დანაშაულის ჩადენისათვის სსკ-ის რიგი მუხლების საფუძველზე. პროექტის ერთ-ერთი მუხლის გათვალისწინებით, სასჯელაღსრულების სისტემაში ბოლო წლებში დამკვიდრებული არაადამიანური და ღირსების შემლახავი მოპყრობის გამო, ამნისტიის აქტის მიღების დღემდე დაპატიმრებულ ყველა მძიმე ან განსაკუთრებით მძიმე დანაშაულისათვის მსჯავრდებულ პირს მოსახდელი (დარჩენილი) სასჯელის ვადა 1/3-ით უნდა შეუმცირდეს. დანაშაულთა ერთობლიობის შემთხვევაში სასჯელთა შეკრებითობის პრინციპით სხვადასხვა მუხლებით შეფარდებული სასჯელის შემთხვევაში, ამნისტია თითოეული მუხლით დანიშნული სასჯელისათვის ცალ-ცალკე იმოქმედებს. ~ამნისტიის პროექტი~ ნასამართლეობის მოხსნასაც ითვალისწინებს. ამასთან დაკავშირებით პროექტის ავტორები აცხადებენ, რომ ნასამართლეობა, მსჯავრდებულის სისხლისსამართლებრივი პასუხისმგებლობისგან გათავისუფლების შემდეგ, მის საზოგადოებაში სრულყოფილად ინტეგრაციისთვის სერიოზულ დაბრკოლებას წარმოადგენს. ბოლო წლებში სასამართლოების მიერ გამოტანილ განაჩენთა ნდობის დაბალი მაჩვენებლის ფონზე კი, ~ამნისტიის პროექტის~ ინიციატორებს ამნისტირებულ პირთათვის სასჯლისგან გათავისუფლების პარალელურად ნასამართლობის მოხსნაც მიზანშეწონილად მიაჩნიათ. ამნისტია არ ვრცელდება იმ შემთხვევებზე, როცა ძირითადი სასჯელი სახით ჯარიმა იქნა შეფარდებული. ასევე დამატებითი სასჯელი, რომელიც თავის დროზე ამნისტირებულ მსჯავრდებულებს შეეფარდათ, ძალაში რჩება და კანონის ამოქმედება მასზე არ გავრცელდება. ~ამნისტიის შესახებ~ კანონპროექტის ავტორები არიან დეპუტატები ეკა ბესელია, გედევან ფოფხაძე და ზვიად კვაჭანტირაძე. წყარო: „ინტერპრესნიუსი“