ღუდუშაურის კლინიკაში წუხელ ინციდენტი მოხდა, რომლის შემდეგ, სავარაუდოდ, გულის შეტევით 48 წლის ბადრაგი გარდაიცვალა. როგორც ღუდუშაურის კლინიკის გენერალური დირექტორის მოადგილემ,  მარინა გელანტიამ ჟურნალისტებს განუცხადა, კლინიკაში პატიმრები ერთმანეთს დაუპირისპირდნენ, რასაც მედპერსონალიც შეესწრო. თუმცა ინციდენტის დეტალებს გამოძიება დაადგენს. მისი თქმით, პატიმრები ღუდუშაურის კლინიკაში გუშინ საღამოს გადაიყვანეს და მათ ზედამხედველობას 10-ზე მეტი ბადრაგი უწევდა. ინციდენტის შემდეგ კი ერთ-ერთი მათგანი, მიუხედავად რეანიმაციული ღონისძიებების ჩატარებისა, სავარაუდოდ, გულის შეტევით გარდაიცვალა. გელანტიას განცხადებითვე, აღნიშნულთან დაკავშირებით გამოძიება უკვე დაწყებულია და ინციდენტის დამსწრე ყველა პირი, მათ შორის მედპერსონალი, დაკითხვაზე იმყოფება. რაც შეეხება გარდაცვლილს, გელანტიას ინფორმაციით, სავარაუდოდ მისი ცხედარი პროზექტურაში გადაასვენეს, იგი დაახლოებით 08.00 საათზე გარდაიცვალა. ინციდენტში მონაწილე პატიმრები   ღუდუშაურის კლინიკიდან უკვე სასჯელაღსრულების დაწესებულებებში დააბრუნეს. სასჯელაღსრულების, პრობაციისა და იურიდიული დახმარების საკითხთა სამინისტრო ღუდუშაურის კლინიკაში მომხდარი ინციდენტის შემდეგ ბადრაგის გარდაცვალებას ადასტურებს. სამინისტროს განმარტებით, სწორედ ექიმის მიმართ სიტყვიერი შეურაცხყოფის შემდეგ ბადრაგმა მოახდინა შესაბამისი რეაგირება, ხოლო ინციდენტის ამოწურვის შემდეგ ბადრაგი უეცარი სიკვდილით გარდაიცვალა. ამასთან, სამინისტროს ინფორმაციით, პატიმრები, რომლებიც გუშინ საღამოს ღუდუშაურის კლინიკაში მოათავსეს, ქსნის დაწესებულებიდან იყვნენ გადაყვანილი ჯანმრთელობის მდგომარეობის გაუარესების გამო.