შინაგან საქმეთა სამინისტროს გენერალური ინსპექციის ყოფილი უფროსი თენგიზ გუნავა ისევ პროკურატურაში დაიბარეს. თენგიზ გუნავას ადვოკატის გიორგი ონიანის განცხადებით, გუნავასთვის არ განუმარტავთ, თუ რის გამო დაიბარეს, თუმცა უთხრეს, რომ  დაკითხვა წარსულ საქმიანობასთან დაკავშირებით მოხდება. გუნავა პროკურატურაში 17:00 საათზეა დაბარებული. ამასთან, ადვოკატის თქმით, ერთ-ერთი ექსპერტიზის პასუხი გუნავას ნარკოტიკებთან დამოკიდებულებასთან დაკავშირებით ცნობილია. ონიანის ცნობით, გუნავამ ორი შემოწმება ჩაიტარა. "ერთი არის თმის ღერის ანალიზი, რომლის პასუხიც ცოტა გვიან იქნება. ასევე, მას ექსპერტის მიერ დაუთვალიერდა სხეული და ექსპერტმა დაწერა დასკვნა, რომ ამ ადამიანს ნანემსარი სხეულზე საერთოდ არ აღენიშნება. ეს ნიშნავს იმას, რომ ბოლო რამდენიმე თვის განმავლობაში ამ ადამიანს ინექცია, ანუ ნემსი საერთოდ არ მოუხმარია. გარდა ამისა, არის კიდევ ერთი დეტალი. ამოღებულია კამერები, სადაც ჩანს, როგორ მიდის გუნავა თავის სახლთან და ორ წუთში შს სამინისტროს მანქანები, რომელშიც გუნავა იჯდა, როგორ მიდიან სამინისტროსკენ. ამ დროს სამინისტროს მიერ დაკავების და ჩხრეკის ოქმში წერია, რომ ადგილზე, სადარბაზოსთან მას ჩაუტარდა დაკავება და ჩხრეკა, რომელიც გაგრძელდა დაახლოებით ნახევარი საათის განმავლობაში. ანუ,  ესეც აბსოლუტურად შეუსაბამოა რეალობასთან", - განაცხადა ონიანმა. თენგიზ გუნავა იარაღის უკანონო შეძენა, შენახვა, ტარებისთვის და ნარკოტის მოხმარების ბრალდებით დააკავეს, რის შემდეგაც მას აღმკვეთი ღონისძიების სახით 10 000-ლარიანი გირაო შეეფარდა და პატიმრობიდან გათავისუფლდა. ამის შემდეგ მან საჩივარი პროკურატურაში უკვე თავად შეიტანა. გუნავას თქმით, მის მიმართ წაყენებული ბრალდებები უკანონოა და უნდა დაისაჯოს ყველა ადამიანი, ვინც ამ უკანონობაში იღებდა მონაწილეობას.