შსს-ს გენინსპექციის ყოფილი უფროსი თენგიზ გუნავა კვლავ დაკავებულია. პროკურატურა მას  ამჯერად საწვავის ტალონებს ედავება და 3000 ლიტრი ბენზინის მითვისების ბრალდებითაა დაკავებული.  თენგიზ გუნავა პროკურატურაში დღეს 17:00 საათზე მივიდა და რამდენიმე საათიანი დაკითხვის შემდეგ დააკავეს. მისი ადვოკატის მალხაზ ველიჯანაშვილის განცხადებით, თენგიზ გუნავა  ამჟამად  პროკურატურაშია და მიმდინარეობს საგამოძიებო მოქმედებები. ადვოკატ გიორგი ონიანის ინფორმაციით კი, გუნავას ბრალი სისხლის სამართლის კოდექსის 333-ე მუხლით (უფლებამოსილების გადამეტება) და 182-ე მუხლით (მითვისება) წაუყენეს. გამოძიება 3000 ლიტრ ბენზინზე ხარჯთაღრიცხვას ითხოვს. როგორც თენგიზ გუნავამ მან პროკურატურაში შესვლამდე ჟურნალისტებს განუცხადა, მისთვის უცნობი იყო, კონკრეტულად რა საქმესთან დაკავშირებით დაიბარეს. "მას შემდეგ, რაც ჩემი კომენტარი გავიდა ტელეკომპანია "მაესტროს" ეთერში, მთხოვეს მოსვლა პროკურატურაში დღეს, 11.00 საათზე, თუმცა, შემდეგ დამირეკეს და მითხრეს, რომ 17.00 საათზე უნდა მოვსულიყავი. როგორც ხედავთ, მე აქ ვარ და მათ დამიბარეს ანტიკორუფციულ დეპარტამენტში. არ ვიცი რასთან დაკავშირებით მიბარებენ. მითხრეს, რომ ჩემს ადრინდელ საქმიანობასთან დაკავშირებით მიბარებენ. ეს ეხება ან გენერალურ ინსპექციას, ან სამეგრელოს, ვერ გეტყვით", - განაცხადა თენგიზ გუნავამ.