იგორ გიორგაძე საქართველოში დაბრუნებაში პრობლემას ვერ ხედავს. როგორც მან  "პრაიმტაიმის" პრესკლუბში მოსკოვიდან პირდაპირი ხიდისას განაცხადა, არც ერთ ხელისუფლებას მისთვის ბრალი ოფიციალურად არ წარუდგენია და, შესაბამისად, ის ვერანაირ პრობლემას ვერ ხედავს, იმაში რომ საქართველოში დაბრუნდეს. „ვერანაირ წინააღმდეგობას ვერ ვხედავ ჩემს ჩამოსვლაზე. მე არანაირი ბრალი არც ერთი ხელისუფლებისგან არ ამქვს. არც ერთი, სასამართლოს მხრიდან ჩემს წინააღმდეგ ბრალი გამოტანილი არ ყოფილა. სამგზის მივმართე საქართველოს მთავრობას, სასამართლოს ჩატარებაზე თუმცა უშედეგოდ. ბრალდება ჩემთვის არც ერთ ხელისუფლებას არ წაუყენებია ამიტომაც ვერ ვხედავ ხელის შემშლელ პრობლემას“, - ამბობს გიორგაძე. გიორგაძე აცხადებს რომ მას პოლიტიკური ცხოვრება საქართველოდან წასვლის შემდეგაც არ შეუწყვეტია, მისი განმარტებით, ის ხელმძღვანელობს „სამართლიან საქართელოს" და საქართველოში დაბრუნების შემდეგ პოლიტიკურ საქმიანობას კვლავ გააგრძელებს. იგორ გიორგაძე პოლიტიკაში საკუთარ სიმპატიაზე არ საუბრობს, თუმცა აღნიშნავს, რომ ბიძინა ივანიშვილისა და ახალი ხელისუფლების ნაბიჯებს მოსკოვში დადებითად აფასებენ, იგი ასევე განმარტავს, რომ  შექმნილი ჩიხური ვითარებიდან გამოსვლა ახალი ხელისუფლებისთვის არც მარტივი იქნება და არც სწრაფად მოხერხდება. პრეზიდენტ ედუარდ შევარდნაძეზე განხორციელებულ თავდასხმაში დადანაშაულებულმა უშიშროების სამსახურის ხელმძღვანელმა იგორ გიორგაძემ საქართველო 1995 წელს დატოვა. იგი „ინტერპოლის“ მიერ იძებნება.