2004 წლელს სვანეთში ჩატარებული სპეცოპერაციის დეტალებზე პროკურატურაში დოდო აფრასიძე დაკითხეს. გოჩა და შმაგი აფრასიძეების დედამ განაცხადა, რომ გამომძიებლებმა შეკითხვები ოჯახის წევრების საქმიანობის შესახებაც დაუსვეს. დოდო აფრასიძე საქმეზე მაშინდელი შინაგან საქმეთა მინისტრის, გიორგი ბარამიძის დაკითხვას ითხოვს. მისი განმარტებით, სპეცოპერაციას სწორედ ბარამიძე ხელმძღვანელობდა. "ვითხოვ მხოლოდ სიმართლის დადგენას, რადგან იმ ე.წ. სპეცოპერაციის დღიდან დღემდე სიმართლე არ თქმულა. იმედი მაქვს, ახალი ხელისუფლება სიმართლეს დაადგენს და ჩემი შვილები უკანონო პატიმრობიდან გათავისუფლდებიან. გიორგი ბარამიძის დაკითხვა არ კმარა. თუ კანონი არსებობს, ის ჩემს შვილებს უნდა ჩაენაცვლოს ციხეში. ბარამიძეს ყველაფრის სააკაშვილზე გადაბრალება არ გამოუვა. მართალია, ბრძანება სააკაშვილმა გასცა და ამით საბავშვო ბაღებში მისვლისასაც კი ტრაბახობდა, მაგრამ ადგილზე ბევრი საზიზღრობა ჩაიდინეს, რასაც ბარამიძე ხელმძღვანელობდა. მას ეს ბრძანება არ უნდა შეესრულებინა. რა არის ისეთი სამსახური, რომ ასეთი ცოდვა აიკიდო?! რა დროს რა მოხდა, უკვე ვეღარ ვაანალიზებ. ისეთი გამწარებული და არეული ვარ, არ ვიცი, როგორ ვუძლებ ამ ყველაფერს", - აღნიშნა დოდო აფრასიძემ. აფრასიძეების დედა მთავარ პროკურატურაში მოწმის სტატუსით გუშინ დაკითხეს. დაკითხვა დაახლოებთ 5 საათს გაგრძელდა. შეგახსენებთ, რომ სვანეთში სპეცოპერაცია 2004 წელს ჩატარდა, რომლის შედეგადაც დაიღუპნენ ევგენი და ომეხ აფრასიძეები, გოჩა და შმაგი აფრასიძეები კი, საპატიმროში იმყოფებიან. გოჩა აფრასიძეს 20 წლით თავისუფლების აღკვეთა აქვს მისჯილი, შმაგი აფრასიძეს კი - 18 წლით. მაშინ საქართველოს შინაგან საქმეთა მინისტრი, გიორგი ბარამიძე იყო. აფრასიძეების ახლობლები ირწმუნებიან, რომ გიორგი ბარამიძე სპეცოპერაციის მიმდინარეობისას ადგილზე იმყოფებოდა.