„მემარცხენე ფრონტის“ ლიდერი სერგეი უდლცოვი უარჰყოფს რუსეთის ფედერაციის საგამოძიებო კომიტეტის ვერსიას იმის შესახებ, თითქოს ქართველი პოლიტიკოსი გივი თარგამაძე ხელმძღვანელობდა რუსეთის ოპოზიციის აქციებს. მოსკოვში 6 მაისს ჩატარებული მილიონთა მარში, ასევე ოპოზიციის სხვა აქციები სამოქალაქო მოძრაობის წარმომადგენლების მიერ დამოუკიდებლად იყო ორგანიზებული,– განაცხადა უდალცოვმა. დღეს რუსეთის ფედერაციის საგამოძიებო კომიტეტმა გაავრცელა ინფორმაცია იმის შესახებ, რომ ქართველი პოლიტიკოსი გივი თარგამაძე არა მარტო ეკონტაქტებოდა რუსეთის ოპოზიციის ლიდერებს, არამედ “უშუალოდ ხელმძღვანელობდა“ 6 მაისს გამართულ მილიონთა მარშს. მასობრივი არეულობების მოწყობის ბრალდებით 17 ოქტომბერს   სისხლის სამართლის საქმე აღიძრა უდალცოვის, მისი თანაშემწე კონსტანტინე ლებედევისა და „მემარცხენე ფრონტის“ აქტივისტის ლეონიდ რაზვოჟაევის წინააღმდეგ. ეს მოჰყვა НТВ–ზე ფილმ "პროტესტის ანატომია-2"–ის გასვლას. მისი ავტორები ამტკიცებენ, რომ რუსეთის ოპოზიცია უცხოეთიდან შემოსული დაფინანსებით გეგმავდა ხელისუფლების ძალისმიერ დამხობას.