პრეზიდენტი შეწყალების დოკუმენტს ხელს დღეს მოაწერს, რის შემდეგაც შეწყალებული პატიმრები ციხეებიდან გათავისუფლდებიან, - ამის შესახებ შეწყალების კომისიის თავმჯდომარე ელენე თევდორაძემ განაცხადა. მისი თქმით, კომისიამ იმ პატიმართა საქმეები განიხილა, რომელთაც სასჯელის ნახევარი მოიხადეს და მსუბუქი დანაშაული აქვთ ჩადენილი. თევდორაძის განმარტებით, შესაძლოა, საბჭოს მიერ რეკომენდირებული პატიმრებიდან ზოგიერთი უკვე ამნისტიით იყოს გათავისუფლებული, თუმცა, იგი ვერ აკონკრეტებს, სავარაუდოდ, რამდენი შეიძლება იყოს ასეთი პატიმარი. კომისიამ 450 საქმე განიხილა და 89 პატიმარს გათავისუფლების რეკომენდაცია მისცა, 13 პატიმარს კი, სასჯელი გაუნახევრდა. 6-მა პატიმარმა კი უარი განაცხადა შეწყალებაზე. იმ პატიმართა შორის, რომელთა საქმეები კომისიამ განიხილა, ქალები და არასრულწლოვნები არ ყოფილან.