"ქართული ოცნების" ცენტრალურ ოფისში პარტია "ქართული ოცნება – დემოკრატიული საქართველოს" პოლიტსაბჭოს სხდომაზე  რეგიონებში პარტიის სტრუქტურული ურთიერთობის გაძლიერების თემატიკას განიხილავენ და აქვე ერთ-ერთი განსახილველი თემა პრეზიდენტობის კანდიდატის საკითხია. რპოლიტსაბჭოს წევრი, დეპუტატი ელისო ჩაფიძე არ უარყოფს,  გავრცელებულ ინფორმაციას, "ქართული ოცნება" პრეზიდენტობის კანდიდატებად სალომე ზურაბიშვილს, ვახტანგ ხმალაძეს, არმაზ ახვლედიანსა და კახი კალაძეს განხილავის შესახებ. დეპუტატ ირინა იმერლიშვილის განცხადებით კი, პოლიტსაბჭოს დღევანდელ სხდომაზე საპრეზიდენტო კანდიდატზე საუბარი არ იქნება, რადგან ეს არა – პარტიის, არამედ კოალიციის პოლიტსაბჭოზე გადასაწყვეტი საკითხია. "ჩვენ დღეს გვაქვს პარტიის პოლიტსაბჭოს სხდომა. საპრეზიდენტო კანდიდატი კი კოალიციის პოლიტსაბჭოს გადასაწყვეტია, ამიტომ ამაზე არ ვიმსჯელებთ. რაც შეეხება იმას, ვინ შეიძლება იყოს კანდიდატი, ვერ გეტყვით. ჩვენ ვისაც ეს შევთავაზეთ, არც ერთი არ ყოფილა მედიაში დასახელებული. მგონია, რომ ეს უფრო მედიის მიერ დასახელებული კანდიდატებია, თუმცა შესაძლოა, მათ მეტი იციან, ვიდრე – მე", - განაცხადა იმერლიშვილმა კითხვაზე, რამდენად განიხილება კოალიციის საპრეზიდენტო კანდიდატებად სალომე ზურაბიშვილის, ვახტანგ ხმალაძის, არმაზ ახვლედიანისა და კახი კალაძის კანდიდატურები. დეპუტატის განმარტებით, კოალიციას ეყოლება საპრეზიდენტო კანდიდატი, რომელიც საზოგადოების უმეტესობისთვის იქნება მისაღები. "მე ვარ ამაში დარწმუნებული. გადაწყვეტილებას მიიღებს კოალიციის პოლიტსაბჭო, სადაც პარტიების ლიდერები და პრემიერი შედიან. კენჭისყრა არ იქნება, კანდიდატზე შევჯერდებით კონსენსუსის გზით. პრემიერს რამდენიმე ფავორიტი კანდიდატი ჰყავს. თუ რომელიმე სხვა პარტიას ეყოლება კანდიდატი, დასახელდება. შემდეგ მოხდება განხილვა და გადაწყვეტილება იქნება მიღებული", - აღნიშნა იმერლიშვილმა. ამასთან, არსებული ინფორმაციით, კოალიცია პრეზიდენტობის კანდიდატის შესარჩევად 11 ან 12 მაისს შეიკრიბება, ხოლო კანდიდატის ვინაობას 13 მაისს დაასახელებს.