საქართველოს ყოფილი პრემიერ-მინისტრი ივანე მერაბიშვილი და შრომის, ჯანმრთელობისა და სოციალური დაცვის ყოფილი მინისტრი ზურაბ ჭიაბერაშვილი დაკავებულია. როგორც პროკურატურაში გამართულ საგანგებო ბრიფინგზე განაცხადეს, ვანო მერაბიშვილის დაკავება მისი პრემიერობის და შინაგან საქმეთა მინისტრობის დროს ჩადენილ დანაშაულებებს, ხოლო ზურაბ ჭიაბერაშვილის დაკავება მისი ჯანდაცვის მინისტრობის დროინდელ საქმეებს ეხება. „ერთიანი ნაციონალური მოძრაობის“ გენერალური მდივანი ვანო მერაბიშვილი და კახეთის მხარის გუბერნატორი ზურაბ ჭიაბერაშვილი პროკურატურაში „ნაციონალური მოძრაობის“ წინასაარჩევნოდ განხორციელებულ, „სამუშაოს მაძიებელთა აღრიცხვის პროგრამის“ საკითხზე იყვნენ დაბარებული. საქმე ეხება ფიქტიური დასაქმების საკითხს, როდესაც აღნიშნული პროექტის განხორციელებისთვის გაცემული ხელფასების სახით, სახელმწიფო ბიუჯეტმა 5 მილიონ ლარამდე იზარალა.